ევროპელი დეპუტატები სტრასბურგში, საქართველოს შესახებ რეზოლუციას დღეს მიიღებენ

პოლიტიკა - 12:06, 01 Oct, 2015

1357

დღეს, 1 ოქტომბერს, სტრასბურგში ევროპის საბჭოს საპარლამენტო ასამბლეის პლენარულ სხდომაზე, მონიტორინგის კომიტეტის ყოველწლიური ანგარიშის მოსმენის შემდეგ, ევროპელი დეპუტატები საქართველოს შესახებ რეზოლუციას მიიღებენ. საქართველოს საპარლამენტო დელეგაცია, რომლის შემადგენლობაში არიან: თედო ჯაფარიძე, მანანა კობახიძე, ეკა ბესელია, ზვიად კვაჭანტირაძე, გუგული მაღრაძე, ლევან ბერძენიშვილი, ირაკლი ჩიქოვანი, დავით ბაქრაძე, გიორგი კანდელაკი და ჩიორა თაქთაქიშვილი, სტრასბურგში 28 სექტემბრიდან იმყოფება. დელეგაციის წევრებმა სხვადასხვა პოლიტიკური ჯგუფების სამუშაო შეხვედრებში მიიღეს მონაწილეობა. ცნობილია, რომ ამ ეტაპზე დოკუმენტში 8 შესწორება შევიდა, აქედან 5 უმრავლესობის ინიციატივით. კენჭისყრამდე რეზოლუციის პროექტს იურდიული კომიტეტის სხდომაზე კიდევ ერთხელ განიხილავენ.

დღესვე საპარლამენტო ასამბლეა მეორე რეზოლუციაზეც იმსჯელებს. მონიტორინგის კომიტეტის ანგარიშში საუბარი საქართველოზეც არის. დოკუმენტში ოპოზიციის მისამართით პოლიტიკური ზეწოლის ფაქტებზეა საუბარი, ასევე ნახსენებია ირაკლი ალასანიას თანამდებობიდან გადაყენება. ანგარიშში მოხვდა რუსეთის მხრიდან ოკუპირებულ აფხაზეთსა და ე.წ. სამხრეთ ოსეთთან გაფორებული სამეკავშირეო ხელშეკრულებებიც.