საქართველოს პრეზიდენტი ამერიკელ კონგრესმენ მაიკლ ტერნერს შეხვდა

პოლიტიკა - 18:30, 30 Sep, 2015

1180

საქართველოს პრეზიდენტმა გიორგი მარგველაშვილმა ქალაქ ვაშინგტონში სამუშაო ვიზიტი დაიწყო. პირველი შეხვედრა გიორგი მარგველაშვილმა ამერიკის შეერთებული შტატების კონგრესში გამართა.

ქვეყნის პირველი პირი ნატო-ს საპარლამენტო ასამბლეის პრეზიდენტს ოჰაიოს კონგრესმენ მაიკლ ტერნერს შეხვდა.

მხარეებმა საქართველოს ჩრდილოატლანტიკურ ალიანსში ინტეგრაციის პროცესი განიხილეს. შეხვედრისას აღინიშნა, რომ საქართველოს ნატო-ში გაწევრება ჩვენი ქვეყნის საგარეო და უსაფრთხოების პოლიტიკის ძირითადი პრიორიტეტია.

ყურადღება ნატო-ს უელსის სამიტსა და არსებითი პაკეტის მნიშვნელობაზეც გამახვილდა, რომელიც საქართველომ ამ სამიტზე მიიღო.

ქვეყნის პირველმა პირმა მადლობა გადაუხადა მაიკლ ტერნერს საქართველოს სუვერენიტეტისა და ტერიტორიული მთლიანობის საკითხებში აშშ-ს მუდმივი და ურყევი მხარდაჭერისთვის, ჩვენი ქვეყნის ევროპული და ევრო-ატლანტიკური ინტეგრაციის პროცესის ხელშეწყობისათვის და იმ ძალისხმევისთვის, რომელიც საქართველოს ოკუპირებული რეგიონების არაღიარების პოლიტიკის გატარებას გულისხმობს.

საუბარი ასევე შეეხო ვარშავის მოახლოებულ სამიტსაც და განსაკუთრებით აღინიშნა აშშ-ს მხარდაჭერის მნიშვნელობა აღნიშნულ სამიტზე.

მხარეებმა ნატო-ს სამშვიდობო მისიებში, ტერორიზმის წინააღმდეგ ქართველი ჯარისკაცების მონაწილეობაზე ისაუბრეს. ასევე საქართველოს პრეზიდენტმა და კონგრესმენმა რუსეთ-საქართველოს ურთიერთობები და საქართველოს ოკუპირებულ ტერიტორიებზე არსებული უსაფრთხოების საკითხები განიხილეს და, ასევე რეგიონში არსებული მდგომარეობა შეაფასეს.

დღეს ვაშინგტონში ასევე დაგეგმილია პრეზიდენტის ორმხრივი შეხვედრები სენატორებთან. გიორგი მარგველაშვილი სიტვით გამოვა სტრატეგიული და საერთაშორისო კვლევების ცენტრში, რის შემდეგაც გაიმართება სამუშაო სადილი ეროვნულ დემოკრატიული ინსტიტუტის ხელმძღვანელობასთან .