ოკუპანტებმა დე ფაქტო აფხაზეთში დამატებითი ძალები შეიყვანეს

პოლიტიკა - 16:37, 30 Sep, 2015

1862

ბოლო ორი დღეა ოკუპირებული აფხაზეთის ტერიტორიაზე, რუსი ოკუპანტების მიერ დამატებითი ძალების შეყვანა შეიმჩნევა.

როგორც "ნიუპოსტის" კორესპოდენტი იუწყება, რუსულ საგუშაგოებზე დამატებით 10 სამხედრო მოსამსახურე დაამატეს.

ოკუპირებული გალის რაიონის დაბალ ზონაში, კერძოდ ოჩამჩირეში კი რუსმა ოკუპანტებმა სამხედრო ტექნიკა განაახლეს - შეცვალეს ჰაერსაწინააღმდეგო დანადგარი. რუსმა სამხედროებმა დამატებითი საგუშაგო გახსნეს სათანჯოს მთასა და ზღვის სანაპიროზე.
ამასთან, ოკუპირებული აფხაზეთიდან მოწოდებული ინფორმაციის თანახმად, დღეს დილით სოხუმს სამშენებლო მასალებით დატვირთული 14 ვაგონი მიადგა. მატარებელი მთლიანად ე.წ ლიანდაგის რელსებით იყო დატვირთული.

დილიდან რუსმა ოკუპანტებმა გაზომვითი სამუშაოები ჩაატარეს. გაზომეს მანძილი ენგურის ხიდამდე, რაც ნიშნავს იმას, რომ აფხაზეთის დეფაქტო მთავრობა რუსეთის დახმარებით რკინიგზას სწორედ ენგურის ხიდამდე აღდგენას გეგმავს.

ოკუპირებულ რეგიონში მიდინარე პროცესებს ადგილობრივები შიშით ხვდებიან. ქართველი მოსახლეობა აცხადებს, რომ რუსების გააქტიურება კარგს არაფერს მოასწავებს.

მათი ინფორმაციით, ოკუპანტებმა სათანჯოს მთისკენ მიმავალი გზა ჩაკეტეს.

მოსახლეობის შიშს შესაძლო დესტაბილიზაციაზე, აფხაზეთის დე ფაქტო პრეზიდენტის გადაწყვეტილება ამყარებს.

რაულ ხაჯიმბას გადაწყვეტილებით, საგუშაგოზე მდგომ ე.წ კონტრაქტიკებს შეცვლიან ის მეომრები, რომლებიც აფხაზეთის საომარ მოქმედებებში და ჩეჩნეთის ომში იღებდნენ მონაწილეობას.

ხაჯიმბას ინფორმაციით, მესაზღვრეების ფინანსურ ანაზღაურებაზე რუსეთის გენერალიტეტი იზრუნებს.