პროკურორი ნათია მეზვრიშვილი ამბობს, რომ მას ე.წ. „ნარუშილოვკა“ არასოდეს არ ჰქონია.

გუშინ გავრცელებულ კადრებზე მეზვრიშვილი განმარტებას სოციალურ ქსელში აკეთებს.

„პირველ რიგში ყველას დიდი მადლობა გულშემატკივრობისთვის. უამრავმა ადამიანმა მომწერა და დამირეკა.

არ ვაპირებდი კომენტარის გაკეთებას, მაგრამ სხვადასხვა ფაქტორის გათვალისწინებით გაცნობებთ, რომ სიმართლე მდგომარეობს შემდეგში:

1. ნათია მეზვრიშვილს არასოდეს ჰქონია ე.წ. „ნარუშილოვკა“;

2. ნათია მეზვრიშვილი, რომელსაც როგორც ამბობენ ჰქონდა ე.წ. „ნარუშილოვკა“, არაერთხელ არის დაჯარიმებული და ჯარიმაც გადახდილი აქვს;

3. ნათია მეზვრიშვილი სარგებლობს სამსახურებრივი ავტომანქანით, რომელზეც გაცემულია მინების დამუქების ნებართვა;

4. ნათია მეზვრიშვილი ე.წ. „სკანდალურ“ ვიდეო-მასალაში, გააჩერეს მინების დამუქებაზე, ხაზს ვუსვამ - ის არ გაუჩერებიათ საგზაო მოძრაობის წესების დარღვევისათვის, რომ ე.წ. „ნარუშილოვკის“ გამოყენების საჭიროება დამდგარიყო (რომელიც არ ჰქონია);

5. ნათია მეზვრიშვილმა საპატრულო პოლიციის თანამშრომელს წარუდგინა სწორედ დამუქების ნებართვა;

6. „ტელეკომპანია რუსთავი 2-მა“ იცოდა, რომ ეს შემთხვევა სწორედ მინების დამუქებაზე გაჩერების შემთხვევათა კატეგორიას მიეკუთვნებოდა და ნათია მეზვრიშვილზე არასოდეს ყოფილა გაცემული სპეციალური საშვი;

7. მიუხედავად ამისა, ტელეკომპანიამ გაავრცელა კადრები (თუ ამას კადრები შეიძლება ეწოდოს), სადაც არც საპატრულო პოლიციის თანამშრომლის მოთხოვნა ჩანს და არც ის, თუ რა დოკუმენტი წარუდგინა მას ნათია მეზვრიშვილმა;

8. მიუხედავად იმისა, რომ კადრებიდან ფაქტიურად არაფერი ჩანდა, ორი დღის მანძილზე ეს თემა მოინათლა როგორც პროკურატურის თანამდებობის პირის მიერ „უკანონო პრივილეგიის გამოყენება“ და არამხოლოდ ........

ეს არის სიმართლე.

აღნიშნულიდან გამომდინარე, იმის გათვალისწინებით, რომ ორი დღის მანძილზე ჩემი სახელი და გვარი ტრიალებდა მეტად არასასურველ კონტექსტში, ეთერში გადაუმოწმებელი ინფორმაციის მიზანმიმართულად არასწორად გაშვებამ გამოიწვია ჩემი პირადი და საქმიანი რეპუტაციის შელახვა, სათანადო სპეციალისტებთან კონსულტაციის შემდეგ, ალბათ მივიღებ გადაწყვეტილებას სამართლებრივი გზებით რეპუტაციის აღდგენის შესახებ.

ეს არის ამ საკითხთან დაკავშირებით ჩემს მიერ გაკეთებული პირველი და უკანასკნელი საჯარო კომენტარი.

მადლობა ყველას კარგი პიარისთვის“, - წერს მეზვრიშვილი.