აშშ-ს ელჩმა ქართველ სამხედროებს მსოფლიო უსაფრთხოების დაცვისთვის მადლობა გადაუხადა

პოლიტიკა - 13:29, 30 Sep, 2015

1002

ავღანეთში ქართველი სამხედროების გაცილების ცერემონიალს აშშ-ს ელჩი იან კელიც დაესწრო. მან ქართველ ჯარისკაცებს მსოფლიო უსაფრთხოებაში შეტანილი წვლილისთვის მადლობა გადაუხადა და აღნიშნა, რომ საქართველომ უნდა იამაყოს იმ თავგანწირვით, რომელსაც მისი შვილები ავლენენ:

„საქართველოს მოქალაქეებს შეუძლიათ იამაყონ იმ სამსახურით, რომელსაც მუდმივად ადასტურებენ ეს სამხედროები, ასევე იმ წვლილით, რომელიც მათ შეაქვთ საერთაშორისო უსაფრთხოებისა და მშვიდობის საქმეში. საქართველოს შეუძლია იამაყოს იმ თავგანწირვით, რომელსაც მისი შვილები ავლენენ, სამწუხაროდ, ბოლო პერიოდში ეს გახლდათ რიგითი ყულჯანიშვილი. რა თქმა უნდა, ვამაყობ ამერიკელი საზღვაო ქვეითებით, რომლებიც წვრთნას გადიოდნენ ქართველების მხარდამხარ და წლების განმავლობაში მსახურობდნენ მათთან ერთად ავღანეთის საერთაშორისო მისიაში." - განაცხადა იან კელიმ.

ავღანეთის მტკიცე მხარდაჭერის მისიაში მონაწილეობის მისაღებად 700-მდე ქართველი სამხედრო გაემგზავრება. ქართველი სამხედროები სხვადასხვა სახის ოპერაციებს ავღანეთის ისლამურ რესპუბლიკაში 7 თვის განმავლობაში განახორციელებენ.