საკრებულოს ოპოზიცია მერიის კეთილმოწყობის სამსახურს თანხების არამიზნობრივ ხარჯვაში ადანაშაულებს

პოლიტიკა - 13:17, 30 Sep, 2015

1185

საკრებულოს ფრაქცია "ნაციონალური მოძრაობის" წევრი თემურ გრიგალაშვილი დედაქალქის მუნიციპალიტეტის მერიაში საბიუჯეტო თანხების არამიზნობრივ ხარჯვაზე საუბრობს.
მისი თქმით, რაიონულ გამგეობებსა და კეთილმოწყობის საქალაქო სამსახურში ინფრასტრუქტურის მიმართულებით არსებული მდგომარეობის შესწავლის შედეგად აღმოჩნდა, რომ ადგილი აქვს სამსახურეობრივ გულგრილობას.
დეპუტატმა მაგალითისთვის საბურთალოს რაიონში მიმდინარე საგზაო სამუშაოები მოიყვანა და ის დოკუმენტი გაასაჯაროვა, რომლის მიხედვით, კეთილმოწყობის სამსახური, ხშირ შემთხვევაში, საგზაო ინფრასტრუქტურის მოწესრიგების მიზნით, ხელშეკრულებას იმ კომპანიებს უფორმებს, რომლებთანაც გარკვეული ინტერესი არსებობს.

„მე წარმოგიდგეთ საბურთალოს რაიონის გამგეობის მიერ კომპანია „ენკოსთან“ გაფორმებულ ხელშეკრულებას საგზაო სამუშაოებზე. ეს ეხება საფეხმავლო ბილიკის მოწყობას ერთერთ მისამართზე. ჩვენთვის ყოვლად გაუგებარია რატომ მოითხოვა რაიონულმა გამგეობამ ტექნიკურ დავალებაში საფეხმავლო ნაწილზე 5 სანტიმეტრიანი ფენის დაგება, როდესაც ყველამ ვიცით, რომ საფეხმავლო ნაწილში იგება 3 სანტიმეტრიანი ფენა. თანხა არის მითითებული 19 ლარი, როცა ნორმალური გათვლების შეთხვევაში ეს თანხა იქნებოდა 10-12 ლარი. კვადრატულობაზე თუ გადავიყვანთ 10 ათასობით ლარი გამოვა" - განაცხადა გრიგალაშვილმა.
თემურ გრიგალაშვილმა დედაქალაქის მერს რეაგირებისკენ მოუწოდა და აღნიშნა, რომ არსებული მდგომარეობის შესწავლის მიზნით, საკითხით შესაბამისი ორგანოები უნდა დაინტერესდნენ.