საქართველოს პრეზიდენტი ყოფილი მაღალჩინოსნების შეწყალებასთან დაკავშირებით მიხეილ სააკაშვილის განცხადებას ეხმაურება.

გიორგი მარგველაშვილის თქმით, შეწყალება სახელმწიფოს ჰუმანური ფუნქციაა და არ დაუშვებს, რომ ეს მექანიზმი რაიმე პოლიტიკურ კონტექსტში იყოს განხილული.

„ძალიან მტკიცედ ვიცავდი შეწყალების მექანიზმის ჰუმანურ ნაწილს და არაფრის დიდებით არ ვუშვებდი და არც არასოდეს დავუშვებ შეწყალების მექანიზმის განხილვას რაიმე პოლიტიკურ კონტექსტში. შეწყალების მექანიზმი არ არის პოლიტიკური საკითხების, პოლიტიკური სამართლის ან უსამართლობის გადაწყვეტის ადგილი. შეწყალების მექანიზმი იყო და რჩება სახელმწიფოს ჰუმანურ ფუნქციად და მე მინდა, ეს კარგად ესმოდეს ყველა იმ პოლიტიკოსს, რომელიც ცდილობს, შეწყალების მექნიზმი განიხილოს პოლიტიკური დისკუსიის ნაწილად. ეს ასე არ მოხდება“, - ამბობს პრეზიდენტი.

საქართველოს მესამე პრეზიდენტი მიხეილ სააკაშვილი ფიქრობს, რომ საქართველოს მოქმედმა პრეზიდენტმა გიორგი მარგველაშვილმა გიგი უგულავა, ვანო მერაბიშვილი და ბაჩო ახალაია უნდა შეიწყალოს.

ეს განცხადება საქართველოს ყოფილმა პრეზიდენტმა რამდენიმე დღის წინ გააკეთა.

ის ამბობს, რომ ბაჩო ახალაიამ ქართული შეიარაღება შექმნა, ვანო მერაბიშვილმა პოლიცია, ხოლო გიგი უგულავამ ყველა სხვა დანარჩენზე მეტი ააშენა თბილისში.