საქართველოს პრეზიდენტი აშშ-ში საგარეო ურთიერთობათა საბჭოში სოტყვით გამოვიდა. გიორგი მარგველაშვილის განცხადებით, საქართველო აქტიური რადარებიდან გაქრა.

“საქართველო გაქრა აქტიური რადარებიდან, ნიუ-იორკის რადარებიდან, ვაშინგტონის მედია საშუალებებიდან. ჩვენ გვსურს, რომ საქართველოს საკითხი დავაბრუნოთ დისკუსიის ფორმატში. ეს არის სწორედ ის პოლიტიკური პროცესები, რომლებიც ვითარდება ჩემს ქვეყანაში, საკმაოდ რელევანტურია არა მხოლოდ საქართველოსთვის, არამედ მთლიანად რეგიონისთვის, ასევე ამერიკის შეერთებული შტატებისთვის. პირველი მიზეზი იმისა, რომ ჩვენ უნდა ვისაუბროთ საქართველოზე და მის განვითარებაზე, არის ის, რომ ჩვენ ქვეყანას გააჩნია უნიკალური მდებარეობა." - განაცხადა პრეზიდენტმა.

მისი თქმით, საქართველო საკმაოდ პატარაა, მაგრამ თავისი მდებარეობიდან გამომდინარე მნიშვნელოვან სტრატეგიულ როლს თამაშობს.

"ჩვენ აქტიურად ვმონაწილეობთ ჩინეთის განვითარების თვალსაზრისით, ასევე ვართ ნაწილი აბრეშუმის გზის კონცეფციის. ჩემი ინტერესია, გავაფართოვოთ ჩემი ქვეყნისა და საზოგადოების შესაძლებლობები" - აღნიშნა გიორგი მარგველაშვილმა.