მარიხუანის მოხმარებაზე პატიმრობის გაუქმებას იურიდიულმა კომიტეტმა მხარი დაუჭირა

პოლიტიკა - 14:20, 29 Sep, 2015

2772

იურიდიულმა კომიტეტმა საქართველოს კანონის პროექტებში "საქართველოს სისხლის სამართლის კოდექსში ცვლილების შეტანის თაობაზე" , "საქართველოს ადმინისტრაციულ სამართალდარღვევათა კოდექსში ცვლილების შეტანის თაობაზე" პირველი მოსმენით მხარი დაუჭირა ცვლილებას, რომელიც მარიხუანას მოხმარების გამო თავისუფლების აღკვეთის გაუქმებას ითვალისწინებს.

კომიტეტის წევრთა მოსაზრებით, მარიხუანას მოხმარება სისხლის სამართლის დანაშაულად უნდა დარჩეს, თუმცა, პატიმრობა როგორც სასჯელი, გაუქმდეს. მათივე აზრით, სასჯელად უნდა განისაზღვროს ჯარიმა და საზოგადოებრივად სასარგებლო შრომა.

აღნიშნული კანონპროექტი უკვე განიხილეს სხვა კომიტეტებში, კანონპროექტს მხარი არ დაუჭირეს ჯანდაცვის და საფინანსო-საბიუჯეტო კომიტეტმა, ხოლო მხარდაჭერა მოიპოვა ადამიანის უფლებათა დაცვის და იურიდიულ კომიტეტებში.

კანონპროექტს ახლა უკვე პარლამენტის სესიაზე ეყრება კენჭი.

დეპუტატ გოგა ხაჩიძის კანონპროექტის თანახმად,მარიხუანის (გამომშრალი, ნედლი), კანაფისა და კანაფის ფისის მცირე ოდენობით, გასაღების გარეშე მოხმარებაზე სისხლისსამართლებრივი პასუხისმგებლობა არ უნდა იყოს. ცვლილების მიხედვით, მსუბუქი ნარკოტიკული საშუალებების პირველ ჯერზე მოხმარება 100 ლარით უნდა დაჯარიმდეს, ხოლო განმეორების შემთხვევაში - 300 ლარით.