"საარჩევნო სისტემის შეცვლა კოალიციის დაშლას გამოიწვევს"

"საარჩევნო სისტემის შეცვლა კოალიციის დაშლას გამოიწვევს" - უსუფაშვილი

პოლიტიკა - 17:46, 28 Sep, 2015

1333

საქართველოს პარლამენტის თავმჯდომარე დავით უსუფაშვილი აცხადებს, რომ 2016 წლის საპარლამენტო არჩევნებისთვის საარჩევნო სისტემის შეცვლა და პროპორციულ სისტემაზე გადასვლა, კოალიციის დაშლას გამოიწვევს.

როგორც უსუფაშვილმა თემის კომენტირებისას აღნიშნა, კოალიციური დოკუმენტი, სადაც კოალიციის მხრიდან დაფიქსირებულია პროპორციულ საარჩევნო სისტემაზე გადასვლის პირობა არ არსებობს.

"საარჩევნო ცვლილებების ვერსია, რაზეც ჩვენ დღეს ვსაუბრობთ, არის სწორედ ის, რამაც პროპორციულ არჩევნემდე უნდა მიგვიყვანოს და, რასაც პირადად მხარს ვუჭერ არა დღეს, არამედ 1989 წლიდან, როცა პარლამენტის შენობაში მოსვლა პირველად მომიწია და ველაპარაკებოდი მაშინდელ კომუნისტურ ხელისუფლებას, თუ როგორ ჩატარებულიყო არჩევნები. თუ მეუბნებით, რომ არჩევნები ამ სისტემით ახლა ჩატარდეს და კოალიცია დავშალოთ, ამ საკითხის გამო მე კოალიციის დაშლაზე არ წავალ, რადგან ქვეყნისთვის და არჩევნებისთვისაც ეს უფრო დიდი უბედურება იქნება", - განუცხადა ჟურნალისტებს პარლამენტის თავმჯდომარემ.

დავით უსუფაშვილმა ის მიზეზები დაასახელა, რატომ არ ცვლის ხელისუფლება საარჩევნო სისტემის მოქმედ მოდელს.

"დავუფიქრდეთ საკუთარ ცხოვრებას – გინდ საზოგადოებრივს, გინდ კერძოს, აღმოვაჩენთ, რომ ძალიან ბევრი საკითხია, რომელიც სწორედ ხვალ არის შესაძლებელი და არა დღეს, ხოლო თუ დღეს შეეცდები იმის გაკეთებას, ვერც იმას მიიღებ და სხვა რამეც შეიძლება გააფუჭო. თუკი არ იქნება კოალიციაში შიდა თანხმობა, ამ კონკრეტული თემის გამო, კოალიციის დაშლა სწორი გამოსავალი იქნებოდა? და თუ სწორი გამოსავლი იქნებოდა, მაშინ რისთვის და ვისთვის იქნებოდა სწორი გამოსავალი? დღევანდელ ქვეყანას კოალიციის დაშლა გამოადგებოდა?! არჩევნების სხვაგვარად ჩატარებისთვის კოალიციის დაშლაა გამოსავალი?თუ კოალიცია დაიშლება, რიგგარეშე არჩევნები იმავე სისტემით ჩატარდება, რაც დღეს გვაქვს, ხოლო ის, რისი გაკეთებაც ზეგისთვის გვინდა, გადაიდება მაზეგ", - აცხადებს უსუფაშვილი.