პარლამენტის თავმჯდომარე ფიქრობს, რომ დავით საგანელიძეს ზოგიერთი დეპუტატის პარლამენტში ყოფნის საკითხზე მაშინ უნდა ესაუბრა, როდესაც ის საკანონმდებლო ორგანოში იყო.

ამის შესახებ მან ჟურნალისტებთან საუბრისას განაცხადა.

მისი თქმით, ახლა დავით საგანელიძისთვის ამ თემაზე საუბარი მარტივია.

„ვის სურს პარლამენტში დარჩენა, ვინ იმსახურებს და თუ ვის აღარ უნდა, ჯობდა, ამაზე ბატონ დავითს მაშინ ესაუბრა, როცა უმრავლესობის ლიდერი იყო. ახლა ამ თემებზე საუბარი მისთვის უფრო მარტივია, მაგრამ ყველას შეუძლია თავისი აზრი გამოთქვას. როდესაც ამ თემაზე ვისაუბრე, ვთქვი არა ის, რომ ვინმე მეტია პარლამენტში, არამედ ის ვთქვი, რომ ვიღაცა ნაკლებია პარლამენტში და მინდა ვისურვო მეტი პროფესიონალი. საქართველოს არცერთი უმაღლესი დაწესებულება და სასწავლებელი არ იძლევა დიპლომს, რომელშიც წერია - პარლამენტარი სპეციალობით. მნიშვნელოვანი ის კი არ არის, ვინ რას აკეთებდა პარლამენტში შემოსვლამდე, არამედ მნიშვნელოვანია ის, პარლამენტში მოსვლის შემდეგ ვინ რას ვაკეთებთ“, - განაცხადა უსუფაშვილმა.