უსუფაშვილი - ქვეყნის წარმატებაზე და წარუმატებლობაზე, პირველ რიგში პასუხისმგებელია პრემიერი

პოლიტიკა - 21:07, 26 Sep, 2015

3044

საქართველოს პარლამენტის თავმჯდომარის განცახდებით, არ არის საჭირო იმ ფაქტის დრამატიზირება, რომ ნიუ-იორკში საქართველოს პრეზიდენტი და პრემიერი ერთდროულად იმყოფებიან, მისი თქმით, მას შემდეგ, რაც საქართველოს კონსტიტუციამ პოლიტიკური ძალაუფლება პრემიერ-მინისტრს დააკისრა, სწორედ პრემიერია აღმასრულებელი ხელისუფლების მეთაური, პრემიერ-მინისტრი და მთავრობაა პასუხისმგებელი პარლამენტისა და საზოგადოების წინაშე, როგორ წავა ქვეყნის საქმე შიგნით თუ გარეთ, ეკონომიკაში, თუ საგარეო პოლიტიკურ ურთიერთობებში.

პარლამენტის თავმჯდომარის აზრით, საგარეო პოლიტიკაში იმდენი საქმეა, რომ ხელისუფლების ყველა შტოს წარმომადგენლის ვიზიტები და შეხვედრები აუცილებელია, რათა ქვეყნის წინაშე წამოჭრილი საკითხები გადაწყდეს.

"პრეზიდენტის საგარეო პოლიტიკური აქტივობები მნიშვნელოვანია, მაგრამ ის უნდა იყოს მთავრობის მიერ ჩამოყალიბებული პოლიტიკის შიგნით და არ მაქვს საფუძველი, ვთქვა, რომ დღეს ასე არ არის. თუ პრეზიდენტი ამას არ ეთანხმება, ვალდებული და იძულებულია, თავი შეიკავოს ზედმეტი აქტივობებისგან, რადგან მას არ შეუძლია, შეასრულოს გარეთ აღებული ვალდებულებები. მაგალითად, ხელშეკრულებაზე ხელმოწერის უფლება აქვს პრეზიდენტს, მაგრამ თუ იმ ხელშეკრულებაში ნაკისრ ვალდებულებას მთავრობა არ ეთახმება, ის ხელშეკრულება ვერ შესრულდება და ქვეყანა დაზარალდება. ეს ძალიან კარგად იცის პრეზიდენტმაც და მთავრობამაც, ამიტომ ასეთ საკითხებზე მიმდინარეობს მუშაობა და საჭიროა ამის კიდევ უფრო დახვეწა. სჯობს, არ იყოს ამ ტიპის საუბრების საბაბი", - განაცხადა დავით უსუფაშვილმა.