"ქამარშემოჭერილი" ხელისუფლება - ბორჯომის გამგეობაში 86 816 ლარის პრემია გასცეს

პოლიტიკა - 12:58, 25 Sep, 2015

2231

პრემიებისა და დანამატების გაცემის პრაქტიკა, კიდევ ერთხელ, კრიტიკის ობიექტი მას შემდეგ გახდა, რაც გაირკვა, რომ ბორჯომის მუნიციპალიტეტის თანამშრომლებზე ბოლო ოთხი თვის განმავლობაში პრემიის სახით 86 816 ლარი გაიცა, ხოლო დანამატმა 6214 ლარი შეადგინა.

ბორჯომის საკრებულოს დეპუტატი, მაია ხრიკაძე ბორჯომის გამგებელს აკრიტიკებს და ამბობს, რომ მუნიციპალიტეტში პრემიების გამოწერის ტენდენციამ სისტემური ხასიათი მიიღო.

„ნამდვილად არ ვარ იმის წინააღმდეგი, წელიწადში სამჯერ თანამშრომელი წახალისდეს, მაგრამ ყოველთვიურად?! 4 თვეში თავის დანამატიანად 100 000 ლარის გაცემა სცდება ყოველგვარ ფარგლებს“- აცხადებს „დემოკრატიული მოძრაობის“ წევრი.

ბორჯომის მუნიციპალიტეტის გამგებელი, დიმიტრი ყიფიანი მსუყე პრემიისა და დანამატის გაცემის ფაქტს ადასტურებს, თუმცა იქვე დასძენს, რომ „ქამრების შემოჭერის“ ინიციატივის გათვალისწინებით, საპრემიო ფონდიდან 100 000 ლარი ინფრასტრუქტურულ პროექტებზე გადაანაწილეს.

ყიფიანი აცხადებს, რომ საჯარო მოხელეებს 4 კვარტალური და 3 სადღესასწაულო პრემიის აღება შეუძლიათ.

„ქამრების შემოწერის პრინციპით, 100 000 ლარი მოვაკელით საპრემიო მუხლს და გადავანაწილეთ ინფრასტრუქტურულ პროექტებში. ამასთან, ვითვალსიწინებთ რეკომენდაციას, რომელიც რამდენიმე ხნის წინ გამოიცა და რომლის თანახმად პრემიები შეიძლება გაიცეს 4 ჯერ კვარტალურად და სამჯერ სადღესასწაულოდ“- აღნიშნა ბორჯომის გამგებელმა.

საქართველოს პრემიერის განცხადებით, "მთავრობა ქამრების შემოჭერის პოლიტიკაზე ჯერ კიდევ თებერვლის თვეში გადავიდა“.

„მზად ვართ, რომ შემოვიჭიროთ ქამრები და მაქსიმალურად ეფექტიანად გავაგრძელოთ მუშაობა. ჩვენ, ალბათ, ადმინისტრაციული ხარჯების შემცირება მოგვიწევს, რომ მაქსიმალურად გონივრულად და მიზანმიმართულად, მიზნობრივად და ნაციონალურად ვხარჯოთ ჩვენი ბიუჯეტი” - განაცხადა ირაკლი ღარიბაშვილმა 21 თებერვალს. თუმცა, როგორც ჩანს ეს ბრძანება ბორჯომის მუნიციპალიტეტში ვერ გაიგეს.

დავით ჯაბაშვილი