"ასეთი არჩევნების ჩატარება პოლიტიკური თავხედობაა"- ოპოზიცია საკონსტიტუციო სარჩელს ამზადებს

პოლიტიკა - 11:03, 24 Sep, 2015

1755

არასაპარლამენტო ოპოზიცია საკონსტიტუციო სარჩელს ამზადებს. ისინი იმ ნორმის არაკონსტიტუციურად გამოცხადებას ითხოვენ, რომლითაც მიმდინარე წლის ოქტომბრის შუალედური არჩევნების ჩატარება იგეგმება.

ოპოზიციის თქმით, არსებული საარჩევნო კანონი და საარჩევნო ნორმა ერთმანეთთან წინააღმდეგობაში მოდის რადგან საკონსტიტუციო სასამართლოს მიერ დადგენილი 15 %-იანი ცდომილების ნაცვლად მარტვილსა და საგარეჯოს ამომრჩველის რაოდენობის ცდომილება 30 %-იანია.

„გაერთიანებული დემოკრატიული მოძრაობის“ ერთ-ერთი ლიდერი გიორგი ახვლედიანი დარწმუნებულია რომ საკონსტიტუციო სასამართლო მათი სარჩელის საფუყძველზე ისეთ გადაწყვეტილებას გამოიტანს, რომ ოქტომბრის არჩევნების ჩატარების წესი არაკონსტიტუციურად გამოცხადდება:

„მას შემდეგ რაც 28 მაისს საკონსტიტუციო სასამართლომ გამოიტანა გადაწყვეტილება ოლქების გათანაბრების აუცილებლობასთან დაკავშირებით, შუალედური არჩევნების ჩატარება ოქტომბრის ბოლოს მარტვილსა და საგარეჯოში პირდაპირპროპორციულად ეწინააღმდეგება კონსტიტუციას. ამიტომ შევა სარჩელი საკონსტიტუციო სასამართლოში და დარწმუნებული ვარ გადაწყვეტილება იმ მიმართულებით, რომ ამ არჩევნებს დღის სინათლე არ ეღირსება“- განაცხადა გიორგი ახვლედიანმა.

„ეროვნულ-დემოკრატიული პარტიის“ ლიდერის ბაჩუკი ქარდავას განცხადებით მსგავსი წესით არჩევნების ჩატარება პოლიტიკური თავხედობაა და ოლქების გათანაბრებასთან დაკავშირებით საკონსტიტუციო სასამართლოს მიერ გამოტანილ გადაწყვეტილებას ეწინააღმდეგება:

„ამომრჩევლის რაოდენობა მარტვილსა და საგარეჯოში აბსოლუტურად განსხვავებულია, მათ შორის 30%-იანი ცდომილებაა, მაშინ როდესაც საკონსტიტუციო სასამართლო გვეუბნება, რომ მხოლოდ 15%-იანი ცდომილება შეიძლება იყოს. ამდენად, ამ გადაწყვეტილების შემდეგ ასეთი არჩევნების ჩატარება პოლიტიკური თავხედობა მგონია, სწორედ ამიტომ გამოვაცხადეთ ჩვენ ბოიკოტი, ახლა კი ვამზადებთ სარჩელს, თუ რამდენად სწორია საკონსტიტუციო სასამართლოს გადაწყვეტილების საფუძველზე , ამ არჩევნების ჩატარება.“ - განაცხადა ბაჩუკი ქარდავამ.