„თავისუფალი საქართველოს“ ლიდერი კახა კუკავა მოქმედ პრემიერს აკრიტიკებს და ამბობს, რომ ხელისუფლების მუშაობის სამი წლის თავზე მთავრობის მეთაური არც ერთხელ შეხვედრია ოპოზიციის წარმომადგენლებს.

„ღარიბაშვილს ოპოზიციასთან შეხვედრის ფორმატი არ ჰქონია, რა იყო ვირუსული დაავადება გვჭირს თუ სხვა ქვეყნის ჯაშუშები ვართ? როცა ამბობ და დეკლარირებული გაქვს, რომ აპირებ ევროპული სახელმწიფოს მშენებლობას ასეთი ქმედება არანორმალურია“ - განაცხადა კუკავამ.

მისი თქმით დღეს ხელისუფლებაში მყოფი პირები წლების წინ პარლამენტის კიბეებთან ითხოვდა საარჩევნო სისტემის ცვლილებას, დღეს კი ეს მოთხოვნა დაივიწყეს.

„ნუთუ შემთხვევით მაინც არ შემოივლიან აქ, რომ იგივე ხალხი იგივე მოთხოვნას აყენებს. ინტერესის საგანი რომ არ არის ეს იმის მანიშნებელია, რომ ჩვენი პარლამენტი საბოლოოდ გამომეჭიაურდა და გამოვოლსკდა. დაკარგა კავშირი ჩვენს საზოგადოებასთან“- აღნიშნა კუკავამ.

ამ წუთებში საკანონმდებლო ორგანოში ფრაქცია "თავისუფალი დემოკრატების" ღია სხდომა მიმდინარეობს.

შეხვედრას საარჩევნო გარემოს გაუმჯობესების მიზნით შექმნილი ინტერპარტიული ჯგუფის წევრები ესწრებიან.

ოპოზიციის შეხვედრას ადგილობრივთან ერთად, საერთაშორისო არამთავრობო ორგანიზაციების წარმომადგენლებიც ესწრებიან.