ჯანმრთელობის დაცვისა და სოციალურ საკითხთა კომიტეტში სამუშაო ჯგუფი შეიქმნა, რომელიც ქვეყნის დემოგრაფიული უსაფრთხოების დაცვისთვის კონცეფციას შეიმუშავებს. სამუშაო ჯგუფში ამ მიმართულებით მომუშავე ექსპერტები, სპეციალისტები და დემოგრაფები შედიან, რომლებიც კომიტეტთან ერთად დოკუმენტზე იმუშავებენ.

კომიტეტის თავმჯდომარის, დიმიტრი ხუნდაძის განცხადებით, ქვეყანა დემოგრაფიული პრობლემის წინაშე დგას. „გაერომ ჯერ კიდევ 2010 წელს მოგვცა ინფორმაცია, რომ ქვეყანას მოსახლეობის რიცხოვნობის შემცირება დაახლოებით 30%-ით ემუქრება. წლების განმავლობაში ქვეყანაში შობადობა მნიშვნელოვნად იყო დაკლებული, ხოლო აბორტების რიცხვი - კატასტროფულად მომატებული“, - განაცხადა დიმიტრი ხუნდაძემ. მისი თქმით, აღნიშნული პრობლემის მოსაგვარებლად კომიტეტმა შეიმუშავა გარკვეული ინიციატივები, რომელთა განხოციელების შედეგად შობადობის მატება და აბორტების რიცხვის მნიშვნელოვნად შემცირება შეინიშნება. თუმცა კომიტეტის თავმჯდომარეს მიაჩნია, რომ დადებითი დინამიკის მიუხედავად, ეს არ არის საკმარისი. „საკითხი უნდა იქნას სახელმწიფო პოლიტიკის რანგში აყვანილი. ეს უნდა იყოს მულტისექტორული ჯგუფი, რათა ყველა მიმართულებით მოხდეს ჩართულობა. დღეს ჩვენ მოგიწვიეთ ქვეყანაში ამ მიმართულებით მომუშავე დემოგრაფები და ექსპერტები, რადგან მნიშვნელოვანია თქვენი შეფასება, თქვენი ხედვები“, - მიმართა სამუშაო ჯგუფის წევრებს დიმიტრი ხუნდაძემ.

დღევანდელ შეხვედრაზე მიიღეს გადაწყვეტილება, რომ კომიტეტმა სპეციალისტებთან ერთად შეიმუშაოს დოკუმენტი, რომელიც დიმიტრი ხუნდაძის თქმით, მტკიცებულებებზე იქნება დაფუძნებული. მისივე ინფორმაციით, დემოგრაფებს უკვე შემუშავებული აქვთ რამდენიმე კონცეფცია. „არსებობს რამდენიმე ვარიანტი, თუმცა დღეს მივიღეთ გადაწყვეტილება, რომ შევქმნათ ერთი შეჯერებული დოკუმენტი, რომელიც იქნება ერთი მძლავრი, ქმედითი დოკუმენტი და რომელიც რეალურად იქნება გამოყენებული“, - განაცხადა დიმიტრი ხუნდაძემ.