"ბურჯანაძემ საარჩევნო კამპანია რუსეთიდან დაიწყო" - წიკლაური ბურჯანაძის მოსკოვში ვიზიტზე

პოლიტიკა - 14:53, 21 Sep, 2015

1510

ნინო ბურჯანაძის მოსკოვში ვიზიტს "ნიუპოსტთან" დეპუტატი ნუგზარ წიკლაური აფასებს.
მისი თქმით, "დემოკრატიული მოძრაობის" ლიდერის გახშირებული ვიზიტი ოკუპანტ ქვეყანაში ბურჯანაძის პრორუსულობით აიხსნება.

"ქვეყნის წინააღმდეგ გადადგმული აშკარა ნაბიჯი. ეს არის საქართველოს მოსახლეობის აღიარებული კურსის საწინააღმდეგო ქმედება. მოსახლეობას სურს ევროპული არჩევანი და არა ოკუპანტი რუსეთი",- განუცხადა "ნიუპოსტს" "ნაციონალური მოძრაობის" ერთ-ერთმა ლიდერმა ნუგზარ წიკლაურმა.

მისი თქმით, ბურჯანაძემ საარჩევნო კამპანია რუსეთიდან დაიწყო.

"როცა რუსეთი სულუფრო და უფრო დესტრუქციული ხდება საქართველოს მიმართ, ამ ტიპის აქტივიზაცია, ურთიერთობების "დალაგების" მცდელობები, როგორც ამას ბურჯანაძე ეძახის, ნიშნავს მხოლოდ და მხოლოდ იმას, რომ ბურჯანაძე საქართველოში პრორუსული განწყობის მქონე ამომრჩეველზე მუშაობს.

თავის დროზე ასეთივე იყო ივანიშვილის გათვლა და ტაქტიკა 2012 წლის არჩევნებამდე, თითქოს მხოლოდ მას შესწევდა უნარი რუსეთთან ურთიერთობის დალაგება, ცხადია, რომ ამაში სიმართლის მარცვალი არ არის. ეს განცხადებები ამომრჩევლის მოტყუებას ისახავს მიზნად, ტყუილია რუსეთთან ურთიერთობის დალაგება იმ პირობებში, როცა საქართველოს რუსეთთან ფუნდამენტური განსხვავება აქვს, მათ შორის საქართველოს ტერიტორიული მთლიანობის საკითხზე. ამ ვიზიტებს ბურჯანაძე გამოიყენებს იმისთვის რომ პრორუსული ამომრჩეველის დარაზმვა მოახდინოს",- განმარტა დეპუტატმა.

ნინო ბურჯანაძე რუსეთში გაემგზავრა. „დემოკრატიული მოძრაობის" ლიდერი მოსკოვში, ქალთა საერთაშორისო ფორუმში იღებს მონაწილეობას. თუმცა როგორც "ნიუპოსტთან" მოძრაობის სხვა წევრები აცხადებენ, მათი ლიდერი კრემლშიც გამართავს შეხვედრას.