ალასანია: “აბსოლუტურად თავსებადი ღირებულებები გვაქვს პრეზიდენტთან “

პოლიტიკა - 14:30, 20 Sep, 2015

2054

“სიმპატიები გვაქვს მის მიმართ, მე ავირჩიე პრეზიდენტი, გვერდში ვედექი მას, რითიც შემეძლო, ჩემს პარტიასთან ერთად და დღეს ყველაზე მაღალი ლეგიტიმაციის მატარებელი ინსტიტუცია არის საპრეზიდენტო ინსტიტუტი”-“თავისუფალი დემოკრატების” ლიდერი, ირაკლი ალასანია, გადაცემა ,,მთავარ თემაში” გიორგი მარგველაშვილის მისამართით ხელისუფლების წარმომადგენლების კრიტიკას ტრაგედიას უწოდებს და პრეზიდენტის მიმართ სიმპატიებს ღიად აფიქსირებს. ის, მარგველაშვილის ზომიერი გადაწყვეტილებების მნიშვნელობასაც უსვამს ხაზს, რაც საზოგადოების ნაკლებად პოლარიზებას ემსახურება: “სამწუხაროა, რომ დღევანდელი კონსტიტუცია, მემკვიდრეობით დატოვებული სააკაშვილისგან, არის ისე დაჩეხილი, რომ პრაქტიკულად ასეთი მაღალი ლეგიტიმაციის ინსტიტუტს არაპროპორციულად შეზღუდული უფლებები აქვს, მაგრამ ყველა შემთხვევაში, ეს არის მაღალი ნდობის მატარებელი ინსტიტუტი. მე ვენდობი მას. მისი გადაწყვეტილებები, მისი გამოსვლები არის ძალიან ზომიერი. შემკვრელი საზოგადოების. სწორედ იმიტომ მომწონს მე გიორგი, რომ ის ყველანაირად ცდილობს, თავი აარიდოს საზოგადოებაში შეიტანოს კიდევ უფრო მეტი პოლარიზება. ბუნებრივია, აქედან გამომდინარე, ჩვენ სიმპატიები გვაქვს მის მიმართ. ტრაგედიაა ჩვენი ქვეყნის პოლიტიკის, როცა პრეზიდენტის წინააღმდეგ ხელისუფლების წარმომადგენლების მხრიდან ისმის კრიტიკა. მე არ ვიცი რა და როგორ იხარშება ამ ადამიანების გონებაში. ეს აზარალებს ქვეყნის იმიჯს. ვხედავ, რომ პერსპექტივაში ჩვენ აბსოლუტურად თავსებადი ღირებულებები გვაქვს პრეზიდენტთან და მის გუნდთანაც. ის, თავად მომხრეა მრავალპარტიულობის, არასამთავრობო სექტორის განვითარების და ეს თანამშრომლობა აუცილებლად გაგრძელდება. Aაბსოლუტურად სწორი გუმანით მიჰყავს მას საქმე, ამიტომაც არის ეს ურთიერთობა მყარი”-აღნიშნა ალასანიამ.