ციხე თითქოს მესამე თვალს გიხსნის... მეორე ნაპირიდან უყურებ ცხოვრებას

ციხე თითქოს მესამე თვალს გიხსნის... მეორე ნაპირიდან უყურებ ცხოვრებას - უგულავა ციხის შესახებ

პოლიტიკა - 23:01, 19 Sep, 2015

1576

გიგი უგულავა პატიმრობაში გატარებულ 15 თვეს იხსენებს. თბილისის ყოფილმა მერმა ციხის ადმინისტრაციის თანამშრომლებს მადლობა ტელეეთერით გადაუხადა.

"ამ ადამიანებს კარგად აქვთ გაცნობიერებული რასთან აქვთ საქმე, ჩემთვის ძლიან მძიმე იყო, საპატიმროს ექიმის გარდაცვალება",- ამბობს "არჩევანთან" საუბრისას გიგი უგულავა.
რაც შეეხება სასჯელაღსრულების დაწესებულებაში არსებულ პირობებს, ნაციონალური მოძრაობის ერთ-ერთი ლიდერი აცხადებს, რომ პატიმრობაში მყოფი ყოფილი მაღალჩინოსნები არანაირი პრივილეგიით არ სარგებლობენ.
"ვიღაცას თუ გონია, რომ ჩვენ ელიტარული პატიმრები ვიყავით, ძალიან ცდება. პირიქით, ჩემი სტატუუსი, ან თუნდაც ყოფილი პრემიერის სახელი, რომელიც იქვე იმყოფება ხშირ შემთხვევაში შემაფერხებელი გამხდარა. პირადად მე 14 თვის განმავლობაში არ მქონდა ტელევიზორი, იმის მიუხედავად რომ კარგად ვიქცეოდი მისი ყიდვის შესაძლებლობა არ მომეცა. ტელევიზირი ერთი თვის წინ მომიტანეს და ზუსტად ვიცი, რომ ესეც ივანიშვილთან შეთანხმდა. ამ გადაწყვეტილებაზე გამეცინა და მივხვდი, რომ ციხეში ჩამსვამენ და ტელევიზორი კომპენსაცია იყო",- განაცხადა თბილისისის ყოფილმა მერმა.
ყოფილი მერის შეფასებით, ციხე არის დიდი გამოცდილება, რომელსაც იქ მყოფი ადამიანი იღებს.

„ციხე თითქოს მესამე თვალს გიხსნის, მეორე ნაპირიდან უყურებ ცხოვრებას. ერთი სარკმელი აქვს ჩემს საკანს, მაგრამ საკმარისი სინათლე არაა, ჩემთვის კი კითხვა მთავარი საქმეა იქ. შემიგროვდა ჩემთვის საინტერესო ბიბლიოთეკა. ცხოვრებას იწყობ იქ, შენ უნდა გაათვითცნობიერო, რომ ეს შენი ახალი ცხოვრების წესია,“ - აცხადებს გიგი უგულავა.

ქალაქის ყოფილი მერი მისთვის პაემანის უფლების არქონაზეც საუბრობს.

„მეუბნებიან, რომ გამოძიების ინტერესებიდან გამომდინარე უარს გეუბნებით პაემანის უფლებით სარგებლობაზე, ე.ი. გამოძიების ინტერესია მე შევხვდები თუ არა 5 წლის ბავშვს? გავიგე, რომ ეს სტანდარტული პასუხია, მაგრამ ეს პასუხი სამართლიანობის განცდის ინსტიქტებს ანგრევს,“ - ამბობს გიგი უგულავა.