ვინ დაუკვეთა სასამართლოს გიგი უგულავას ციხეში შებრუნება?

პოლიტიკა - 22:32, 19 Sep, 2015

5205

გიგი უგულავა აცხადებს, რომ მოსამართლე, ლაშა ჩხიკვაძე მოწყვლადია. თბილისის ყოფილ მერთან ჩაწერილი ინტერვიუდან ჩანს, რომ უგულავა საქალაქო სასამართლოს მიერ მისი მისამართით გამამტყუნებელი განაჩენის დადგომას არ გამორიცხავდა.

"დანამდვილებით ვიცი, რომ ივანიშვილი ზემოქმედებს სასამართლოზე, დანამდვილებით ვიცი, როგორ აკეთებს ამას, ამ საქმეში ჩართულია ფარცხალაძე, შოთაძე არიან სხვა შუამავალი პირები... როცა ეს შუამავალი პირები, იქნება ეს თავმჯდომარე თუ სხვა პირები ვერ ქაჩავენ შემდეგ ისინი პირდაპირ მოსამართლეზე გადიან, უჩხიკავენ ბიოგრაფიაში რაღაც კომპრომატს და ხდება მანიპულირება",- აცხადებს უგულავა ინტერვიუში, რომელიც "რუსთავი 2"- მა მისი დაპატიმრებიდან ცოტა ხნით ადრე ჩაწერა.
მისი თქმით, შანტაჟს "სუსი" აწარმოებს.

"მათ ჰყავთ, ე.წ ოპრიჩნიკები, რომლებიც ერთი კონკრეტული ადამიანის დავალებების შესრულებით არიან დაკავებულები. ამ ადამიანის ინტერესის სფერო კი პოლიტიკური ოპონენტების დევნაა",- აღნიშნა თბილისის ყოფილმა მერმა.

გიგი უგულავამ სასამართლო სფეროში დღეს არსებულ ხარვეზებზეც გაამახვილა ყურადღება.

მისი თქმით, მის საქმეზე სასამართლო სისტემა აღმოჩნდა გამოუვალ მდგომარეობაში.

„სასამართლოზე ხელისუფლების ზეწოლაზე უფრო ცუდი ცდუნება საზოგადოების აზრის ზეწოლაა, რასაც დღეს განიცდის ეს სისტემა,“ - ამბობს გიგი უგულავა.

მისი თქმით, არსებული სასამართლო სისტემის გამოსავალი არის ნაფიცი მსაჯულების სისტემის გაძლიერება.

უგულავა ხელისუფლებაში მოსვლის შემთხვევაში ამ სისტემის გაძლიერებას აპირებს.

„მე თუ შანსი მექნა და უმრავლესობით მოვედი პოლიტიკაში, პირველი რიგის ამოცანად სწორედ ნაფიც მსაჯულთა ინსტიტუტის გაძლიერება იქნება,“ - აცხადებს გიგი უგულავა.