საქარველოს განათლებისა და მეცნიერების სამინისტროში „ნიუპოსტს“ დაუდასტურეს ინფორმაცია, რომ უწყებაში ახალ რეგულაციაზე მუშაობენ, რომლის ძალაში შესვლისთანავე პირველკლასელების კერძო სკოლიდან საჯარო სკოლაში გადაყვანა შესაძლებელი აღარ იქნება.

სანიკიძის უწყების პრესსამსახურში დღეს დამატებითი დეტალებზე საუბარი არ ისურვეს და გვითხრეს, რომ დოკუმენტი "თითქმის დამტკიცებულია და სავარაუდოდ ორშაბათს შევა ძალაში".

„პროექტი დასრულებულია... თითქმის მიღებულია. საუბარია იმაზე რომ პირველკსასელის გაყვანა შესაძლებელი არ იქნება პირველ წელსვე, როგორც ვიცი, მხოლოდ ერთი წლის შემდეგ გახდება შესაძლებელი ბავშვის კერძო სკოლაში გადაყვანა“,- უთხრეს „ნიუპოსტს“ განათლებისა და მეცნიერების სამინისტროში.

ამასთან, ჩვენ განათლების სამინისტროს კულვარებში გავარკვიეთ, რომ რეგულაციის დაზუსტება მას შემდეგ გახდა აუცილებელი, რაც გაირკვა, რომ იმ პირველკლასელთა მშობლები, რომლებმაც ასაკობრივი შეზღუდვის გამო შვილები კერძო სკოლაში მიიყვანეს, მასიურად ტოვებენ ფასიან კერძო სკოლებს და ბავშვები საჯარო სკოლებში შეჰყავთ.

ფაქტზე კომენტარი განათლებისა და მეცნიერების ყოფილ მინისტრს, დიმიტრი შაშკინს ვთხოვეთ, რომელიც იმედოვნებს რომ ეს რომელიმე თანამშრომლის ახირებაა და არა სამინისტროს გადაწყვეტილება.

„დიდი იმედი მაქვს, რომ რაღაც გაუგებრობასთან გვაქვს საქმე. ფაქტი რომ მსგავსი იდეები არსებობს განათლების სამინისტროში, მეტყველებს იმაზე, რომ განათლების მინისტრი არის სრულიად არაადეკვატური. ეს არის სრული მარაზმი, დეგენერატიზმი, სხვა სიტყვას ვერ მოვუძებნი. უნდა გვესმოდეს რომ ჩვენს ქვეყანაში ადამიანი არის თავისუფალი. დემოკრატიისა და ცივილიზებული ქვეყნის ერთ-ერთი ატრიბუტი და სიმბოლო არის თავისუფალი ადამიანი. თუ ვინეს ავადმყოფ თავში მწიფდება იდეა მსგავსი შეზღუდვების, ამას კრეტინიზმის მეტ კვალიფიკაციას ვერ მივცემ. დიდი იმედი მაქვს რომ ეს მხხოლოდ ავადმყოფი ჩინოვნიკის მოსაზრებაა და მის რეალიზებას ადგილი არ ექნება“,- განაცხადა განათლებისა და მეცნიერების ყოფილმა მინისტრმა.

სანიკიძის უწყების ახალ რეგულაციაზე აქტიურად საუბრობენ კერძო სკოლების მშობლები, რომლებიც ფაქტის გამო გაღიზიანებას ვერ მალავენ.

„განათლების სამინისტროს ლოგიკით ჩემი შვილი რომელიც პირველ კლასშია და ჯერ 6 წლის არაა თუ არ იყო მზად პირველი კლასისთვის, მომავალ წელს იქნება მზად მე-2 კლასისთვის? თუ კერძო სკოლამ მიიღო და სასწავლო პროგრამას ნორმალურად ითვისებს, რატომ უნდა გახდეს პრობლემა მისი საჯარო სკოლაში გადაყვანა? თან კონკრეტულად პირველ კლასზე შეზღუდვა? რა საჭიროა ამდენი რეგულაციები. 6 წლამდე ბავშვებთან ბრძოლას სჯობია განათლების ხარისხის გასაუმჯობესებლად იბრძოლონ“ - განუცხადა „ნიუპოსტს“ ერთ-ერთმა მშობელმა.

დავით ჯაბაშვილი