პოლიტიკა თუ ჭიდაობა - „უგულავას ციხეში შებრუნება ხელისუფლების სრული მარცხი იქნება“

პოლიტიკა - 12:30, 18 Sep, 2015

4041

პოლიტოლოგი გია ხუხაშვილი გიგი უგულავას კიდევ ერთხელ შესაძლო დაპატიმრებას „ნიუპოსტთან“ აფასებს.

ხუხაშვილი თქმით, გუშინ "ნაციონალურმა მოძრაობამ" მთავარობას ერთი რაუნდი მოუგო, ხოლო დღეს თუ ყოფილ მერს კვლავ გაუშვებენ საპატიმროში ეს „ქართული ოცნების“ სრული ფიასკო იქნება.

„პოლიტიკურად ეს რაუნდი ხელისუფლებამ "ნაციონალურ მოძრაობასთან" წააგო. მოცემულობა დღეს ასეთია: გიგი უგულავა ან ბრუნდება მატროსოვზე ან არა. ხელისუფლების წაგების ხარისხი იქნება ძალიან მძიმე თუ თბილისის ყოფილი მერი წავა წიხეში. უგულავას საბყრობილეში შებრუნების შემთხვევაში საგარეო განწყობები არ იქნება ხელისუფლებისთვის სახარბიელო. ძნელი იქნება დასავლეთისთვის იმის ახსნა, რომ ერთი მხრივ საკონსტიტუციო სასამართლოს გადაწყვეტილებით პირი გათავისუფლდა, მეორე დღეს კი მას კვლავ აპატიმრებენ. ქვეყნის შიგნით დაკავების ახსნა მეტ-ნაკლებად შესაძლებელი იქნება, მაგრამ უცხოელებისთვის, რომლებიც ლუპაში არ იხედება, ამის ახსნა ძალიან რთული იქნება“,- განაცხადა გია ხუხაშვილმა.

„ნიუპოსტმა“ პოლიტოლოგს უმრავლესობის დეპუტატის, თამაზ მეჭიაურის განცხადების კომენტირება სთხოვა, რომლის მიხედვითაც „უგულავას გათავისუფლება ნაციომალების მხოლოდ რამდენიმე საათიანი ზეიმია“.

„თუ ხელისუფლებაში პოლიტიკა მეტ-ნაკლებად ესმით, მაშინ ასეთ განცხადებებს არ უნდა აკეთებდნენ. უგულავას ციხეში შებრუნება ხელისუფლების კიდევ უფრო დიდი წაგებაა. ამ პოლიტიკურ კარტს ნაციონალური მოძრაობა ძალიან კარგად გაათამაშებს. ვინც ამბობს, რომ რამდენიმე საათი და უგულავას ციხეში შევაბრუნებთ მას პოლიტიკა უბრალოდ არ ესმის და ის უყურებს ამას ტექნიკურად, ჭიდაობის პრინციპით, პოლიტიკა არ არის ჭიდაობა."- განაცხადა ხუხაშვილმა.