პარლამენტის თავმჯდომარე პროკურატურის მისამართით გამოთქმულ კრიტიკას გამოეხმაურა. მისი თქმით ხარვეზების არსებობაში დამნაშავე არა თავად პროკურატურა არამედ ის ადამიანები არიან ვისაც არასწორი და არაკონსტიტუციური კანონების მიღებაში აქვთ მონაწილეობა მიღებული:

„დღეს მესმის განცხადებები, რომ … სახეზეა პროკურატურის კოლაფსი. პროკურატურა მოქმედებდა მოქმედი კანონის შესაბამისად, როდესაც გადაწყვეტილებებს იღებდა. ის სასამართლოები მოქმედებდნენ მოქმედი კანონის შესაბამისად…

ამიტომ, თუ ვინმე არაფერ შუაშია ამ კონკრეტულ საკითხში, ეს არის პროკურატურა, ეს არიან ის მოსამართლეები, რომლებმაც თავის დროზე მიიღეს გადაწყვეტილებები. თუ ვინმე შუაშია, ვის მიუღია არასწორი და არაკონსტიტუციური კანონები, რის საფუძველზეც შემდგომ მიდიოდა პრაქტიკა, ეს არის წლების წინ მიღებული გადაწყვეტილებები პარლამენტის მიერ. აქ ახლა ჩვენ არ ვიხსნით და არ უნდა მოვიხსნათ პასუხისმგებლობა ჩვენ თავზე იმიტომ, რომ ბევრი კანონი გავასწორეთ, ბევრი კიდევ უნდა გავასწოროთ, ესეც შეიძლება მალე გაგვესწორებინა, ხვალ კიდევ შეიძლება სხვა თემები აღმოვაჩინოთ. მაგრამ ახლა თითის გაშვერა, ვინაა და ვისი კოლაფსია, კოლაფსი იმისია, ვინც დღემდე ხმა არ ამოიღო, ჩემით დაწყებული და პატივცემული ოპოზიციონერებით დამთავრებული, ვისაც ჰქონდა საკანონმდებლო ინიციატივის უფლება. ასე, რომ სხვების კოლაფსზე ლაპარაკი არ გვინდა”.- განაცხადა დავით უსუფაშვილმა.

შეგახსენებთ სამართლებრივის სისტემის კოლაფსზე დღეს „თავისუფალი დმეოკრატების“ ლიდერმა ირაკლი ალასანიამ ისაუბრა, მისი თქმით საკონსტიტუციო სასამართლოს გადაწყვეტილების შემდეგ გიგი უგულავას გასათავისუფლებლად ღონისძიებები სასწრაფოდ უნდა გატარდეს. ნორმალურ ქვეყანაში მსგავსი პროცედურები ავტომატურ რეჟიმში ჩატარდებოდა. მისივე განცხადებით, სახეზეა სამართლებრივი სისტემის კოლაფსი.