უგულავა ისეთივე უდანაშაულო ან ისეთივე დამნაშავეა, როგორც იყო გუშინწინ

უგულავა ისეთივე უდანაშაულო ან ისეთივე დამნაშავეა, როგორც იყო გუშინწინ - უსუფაშვილი

პოლიტიკა - 16:07, 17 Sep, 2015

3106

გიგი უგულავას პატიმრობასთან დაკავშირებით, საკონსტიტუციო სასამართლოს მიერ მიღებული გადაწყვეტილების შესახებ პარლამენტის თავმჯდომარემ დღეს გამართულ ბიუროს სხდომაზე ისაუბრა. უსუფაშვილის თქმით, საკონსტიტუციო სასამართლომ იმსჯელა არა უგულავას ბრალეულობაზე, არამედ კანონის კონსტიტუციასთან შესაბამისობაზე:

„გიგი უგულავა ისეთივე უდანაშაულო ან ისეთივე დამნაშავეა როგორც იყო გუშინწინ. საკონსტიტუციო სასამართლოს არ უმსჯელია ვინმეს ბრალეულობაზე და ავკარგიანობაზე. საკონსტიტუციო სასამართლომ იმსჯელა კანონის კონსტიტუციურობასთან დაკავშირებით შეტანილ დავაზე. კანონი, რომელიც წინა მოწვევის პარლამენტებმა მიიღეს, ნაციონალური მოძრაობის ხელისუფლებაში ყოფნის დროს. სასამართლომ იმ კანონების გარკვეულ მუხლებზე თქვა, რომ ეს არის არაკონსტიტუციური. ამასთანავე ამ კანონების შეცვლასთან დაკავშირებით არ შემოსულა არანაირი ინიციატივა არც წინა მოწვევის და არც ამ მოწვევის პარლამენტში. ასე რომ ჩვენი ოპოზიციონერი კოლეგები, რომლებიც დღეს სხვანაირად წარმოაჩენენ ამ თემას, მინდა რომ ყველასთვის ნათელი იყოს ეს ამბავი. მოპასუხე სასამართლოში იყო პარლამენტი, ვინაიდან ჩვენ ვართ სამართალმემკვიდრე და მოქმედ კანონმდებლობაზე ჩვენ ვართ პასუხისმგებელნი. ჩვენ საკონსტიტუციო სასამართლო შექმნილი გვაქვს იმისთვის, რომ საქართველოს პარლამენტს გაუწიოს მეთვალყურეობა, იმიტომ რომ კონსტიტუციის შესაძლო დამრღვევევი ვართ ჩვენ, რადგან სასამართლო ამოწმებს კანონის შესაბამისობას კონსტიტუციასთან. ანუ კონსტიტუციურად არის შექმნილი ის სისტემა, რომ პარლამენტი შესაძლოა აღმოჩნდეს არასწორი, ამიტომ ამასთან დაკავშირებით ჩვენ არ უნდა გვქონდეს რაიმე მტკივნეული განცდები, ეს არის ჩვეულებრივი, ნორმალური პროცესი როგორც არის სხვა შემთხვევები“- განაცხადა პარლამენტის თავმჯდომარემ.

უსუფაშვილმა სასამართლოების და მოსამართლეების შესახებაც გააკეთა კომენტარი და იმედი გამოთქვა, რომ მომავალში სასამართლოები და მოსამართლეები საზოგადოებას არ მისცემენ იმის ფიქრის საბაბს, რომ რაიმე მოვლენების გამო სასამარტლო პროცესები ჭიანურდება ან ჩქარდება:

„ ჩვენ გვინდა მოსამართლეები, რომლებიც ყველაფერს უსმენენ , მაგრამ მოქმედებენ საკუთარი სინდისის კარნახით და სხვას არავის არ ემორჩილებიან. ამიტომ თუ ვინმეს საბაბი გაუჩნდა, რომ გაჭიანურებას ქონდა ადგილი, ან ნამეტანი დაჩქარებას, რაღაცა მოვლენების გამო. მე მინდა ვისურვო, რომ მსგავსი ამბები არ განმეორდება და სასამართლოები და მოსამართლეები არ მოგვცემენ მსგავსი შეკითხვების დასმის საფუძველს და საბაბს.“- განაცხადა დავით უსუფაშვილმა.