გარემოს დაცვის მინისტრი გიგლა აგულაშვილი მიიჩნევს, რომ საკონსტიტუციო სასამართლოს გადაწყვეტილება უნდა აღსრულდეს იმის მიუხედავად, მოსწონს თუ არა ვინმეს მისი შინაარსი.

ამის შესახებ აგულაშვილმა ჟურნალისტებთან საუბრისას განაცხადა.

„საკონსტიტუციო სასამართლოს პლენუმის გადაწყვეტილებას ყველა უნდა დავემორჩილოთ. ნებისმიერ დემოკრატიულ სახელმწიფოში სასამართლოს გადაწყვეტილების მიმართ დამორჩილება არის დემოკრატიის ძალიან მაღალი ნიშნული. ასევე სიამაყით შემიძლია ვთქვა, რომ იმ მთავრობის წარმომადგენელი ვარ, რომელმაც შეძლო უზრუნველეყო ისეთი სამართლებრივი სივრცის შექმნა, როდესაც შესაძლებელია მსგავსი ტიპის გადაწყვეტილებების მიღება, რომელიც იწვევს საკმაოდ დიდ აზრთა სხვადასხვაობას“, - აცხადებს გიგლა აგულაშვილი.

შეგახსენებთ, საკონსტიტუციო სასამართლომ დედაქალაქის ყოფილი მერის სარჩელი უკანონო პატიმრობასთან დაკავშირებით ნაწილობრივ გუშინ დააკმაყოფილა.

სასამართლოს გადაწყვეტილების მიხედვით, 9-თვიანი წინასწარი პატიმრობის გასვლის შემდეგ, გამამტყუნებელი განაჩენის გარეშე, მისთვის წინასწარი პატიმრობის შეფარდება სხვა საქმეზე არაკონსტიტუციურად ცნო.