„საქართველოში ჭორვილის დიქტატურა ვერ შედგება“ - ე.წ. მატროსოვის ციხესთან უგულავას თანაგუნდელები იკრიბებიან

პოლიტიკა - 22:28, 16 Sep, 2015

1789

საკონსტიტუციო სასამართლოს გადაწყვეტილების შემდეგ, სასჯელ აღსრულების მე-9 დაწესებულებასთან გიგი უგულავას თანაგუნდელები არიან შეკრებილნი. იქ იმყოფებიან, გიგა ბოკერია, ნიკა მელია, ზურაბ ჭიაბერაშვილი და სხვები. ე.წ. მატროსოვი ციხეში ელოდებიან ადვოკატ ბეკა ბასილაიას, რომელმაც სასამართლოს გადაწყვეტილება ციხის ადმინისტრაციას უნდა ჩააბაროს.

,,გიგი უგულავა უკანონო პატიმარია, რაც დაადასტურა დღეს საკონსტიტუციო სასამართლომაც“ - აცხადებენ ნაციონალური მოძრაობის წევრები.

„ყველაზე მაღალი ინსტანციის სასამართლო გადაწყვეტილებით დადასტურდა, რომ უგულავა უკანონო პატიმარი იყო, მთელი ამ თვეების განმავლობაში არის პოლიტიკური პატიმარი, ივანიშვილის დაკვეთით მჯდომი პოლიტიკური პატიმარი. ამ გადაწყვეტილების გამოცხადებისთანავე ის პატიმრობიდან უნდა იქნას გათავისუფლებული, ვინც ამას ხელს შეუშლის, ის არამხოლოდ პოლიტიკურ დაკვეთას ასრულებს, არამედ სისხლის სამართლის დანაშაულს სჩადის,“-განაცხადა გიგა ბოკერიამ.

„საქართველოში ჭორვილის დიქტატურა ვერ შედგება. ბიძინა ივანიშვილს დღეს უზურპირებული აქვს პრაქტიკულად ყველაფერი, მაგრამ ამ ქვეყანაში არიან ადამიანები, ამ ქვეყანაში არის საკონსტიტუციო სასამართლო, რომლებიც საქართველოს სახელმწიფოებრივ წესრიგს დაიცავს,“-განაცხადა ჭიაბერაშვილმა.