გარემოს დაცვის სამინისტრო ხუდონჰესის მშენებლობის დაწყებაზე ნებართვის გაცემას აპირებს.

ამის შესახებ მინისტრმა გიგლა აგულაშვილმა ხაიშში მიმდინარე საპროტესტო აქციის კომენტირებისას განაცხადა.

მისი თქმით, ნებართვა მას შემდეგ გაიცემა, რაც დაინტერესებული ორგანიზაციები შენიშვნებს წარმოადგენენ.

„შენიშვნების გადამუშავების შემდეგ ჩვენ ვგეგმავთ გავცეთ ნებართვა იმის მიხედვით, თუ როგორი ვითარება გვექნება. ახლა მიმდინარეობს მოსამზადებელი სამუშაოები. ნებართვის გაცემის შემდეგ დაიწყება პროექტით გათვალისწინებული ძირითადი სამუშაოები",- განაცხადა აგულაშვილმა.

შეგახსენებთ, სვანეთში, ხაიში-მესტიის გზის ცენტრალური მონაკვეთი ადგილობრივმა მოსახლეობამ გადაკეტა. აქციის მონაწილეები ხუდონჰესის მშენებლობის შესაძლო დაწყებას აპროტესტებენ. აქციაზე სამართალდამცავებსა და შეკრებილებს შორის სიტყვიერი დაპირისპირება მოხდა.