უმრავლესობის დეპუტატს ზვიად კვაჭანტირაძეს პეკინის ქუჩაზე, საბავშვო ბაღის ადგილზე მრავალსართულიანი კორპუსის აშენების იდეა არ მოსწონს.

ამის შესახებ კვაჭანტირაძე სოციალურ ქსელში წერს და ამბობს, რომ საკითხის მიმართ მერიის წარმომადგენლებს გულგრილი დამოკიდებულება აქვთ.

„აქამდე რომ არ მეცადა დღეს საჯაროდ არ დავპოსტავდი, მაგრამ რადგანაც ასეა...რადგანაც უკაცრავად და "გკიდიათ" მეც ხმამაღლა შევუერთდები ხალხის პროტესტს, ვინაიდან ვთვლი, რომ 1. პეკინის ქუჩის მოსახლეობა მართალია 2. თბილისის მერიის შესაბამისი ჩინოვნიკების ასეთი გულგრილი დამოკიდებულება მოსახლეობის ინტერესების მიმართ კატეგორიულად მიუღებელია და უსამართლოდ და ხელოვნურად განაწყობს ხალხს ზოგადად ხელისუფლების წინააღგმდეგ.

ამას არ დავუშვებთ!

ჩვენ ვართ ხალხის ხელისუფლება და ხალხის ინტერესი ჩვენთვის არის ნომერ პირველი საზრუნავი. ვისაც ეს არ ესმის, იმათ არაფერი ესაქმებათ ჩვენს გვერდით“, - წერს კვაჭანტირაძე.

პეკინის ქუჩაზე, ადგილობრივი მოსახლეობა საბავშვო ბაღის დემონტაჟის მიმდინარეობას აპროტესტებს. მათი თქმით, საბავშვო ბაღის, „საპოვნელას“ ადგილზე თექვსმეტსართულიანი საცხოვრებელი კორპუსის მშენებლობა იგეგმება, მათივე განცხადებით ბაღის დემონტაჟი კანონის დარღვევით მიმდინარეობს. ადგილობრივი მოსახლეობა საბურთალოს მაჟორიტარ დეპუტატ დავით უსუფაშვილს უყურადღებობაში ადანაშაულებს. ადგილობრივების განცხადებით, დაგეგმილია ბაღის ტერიტორიაზე არსებული წიწვოვანი ხეების მოჭრაც.