შეწყდება თუ არა სასწავლო პროცესი გურიაში პრემიერის ვიზიტისას- მთავრობის ადმინისტრაციის განცხადება

პოლიტიკა - 12:40, 15 Sep, 2015

2100

გავრცელებულ ინფორმაციას იმის შესახებ, რომ გურიაში პრემიერ-მინისტრის ვიზიტის გამო დღეს, სასწავლო და სამუშაო პროცესი შეწყდება, მთავრობის ადმინისტრაცია გამოეხმაურა. აღნიშნულთან დაკავშირებით მთავრობის ადმინისტრაციამ საგანგებო განცხადება გაავრცელა, რომელსაც "ნიუპოსტი" უცვლელად გთავაზობთ.
"გვსურს, გამოვეხმაუროთ ერთ-ერთი მედიასაშუალების მიერ გავრცელებულ ინფორმაციას, თითქოს, საქართველოს პრემიერ-მინისტრ ირაკლი ღარიბაშვილის ოზურგეთში სტუმრობასთან დაკავშირებით, მუნიციპალიტეტში სასწავლო და სამუშაო პროცესი შეწყდა.

კატეგორიულად ვაცხადებთ, რომ აღნიშნული ინფორმაცია სიმართლეს არ შეესაბამება.

ოზურგეთი დღეს „ალეგრობას“ ზეიმობს. სახალხო ზეიმში, რომელიც 150 წელზე მეტს ითვლის, მოსახლეობა საკუთარი სურვილით მონაწილეობს, რაც, ბუნებრივია, სასწავლო და სამუშაო პროცესის შეფერხებას არ იწვევს.

ასევე აღსანიშნავია, რომ ზეიმი 14:00 საათზე იწყება, რა დროსაც სასწავლო პროცესი უკვე დასრულებულია. ჩვეულ რეჟიმში გრძელდება სამუშაო პროცესიც, თუმცა ეს არ გამორიცხავს იმას, რომ სახალხო ზეიმს საჯარო მოხელეები სურვილისამებრ შეუერთდნენ.

სახალხო დღესასწაულს პრემიერ-მინისტრი ირაკლი ღარიბაშვილი დაესწრება და ოზურგეთელებს ალეგრობას მიულოცავს,"- ნათქვამია განცხადებაში.