ნარმანიასა და კალაძეს შორის შავმა კატამ გაირბინა - რატომ დაუპირისპირდა მერი ვიცეპრემიერს

პოლიტიკა - 15:50, 14 Sep, 2015

6299

გაზეთ „ალიას“ ინფორმაციით, მერიის ახალგაზრდულ საქმეთა საქალაქო სამსახურის ხელმძღვანელი გიორგი არეშიძის მიერ ახალგაზრდული ბანაკის გახსნისთვის გადარიცხული თანხა 100 ათას ლარი დედაქალაქის მერის და ვიცე პრემიერის დაპირისპირების მიზეზი გახდა.

„ქალაქის მერს დავით ნარმანიას ამ სკანდალზე საკმაოდ მწვავე რეაქცია ჰქონდა. ირკვევა, რომ დავით ნარმანიამ არეშიძის სამსახურიდან წასვლის მოთხოვნაც კი დააყენა ხელისუფლების ზედა რგოლებში. დავით ნარმანიასა და ვიცეპრემიერ კახი კალაძეს შორის ამ საკითხის გამო მწვავე საუბარი შედგა, როგორც ამბობენ, მათ შორის უკვე შავმა კატამ გაირბინა. „ქართული ოცნების“ სხვა ლიდერებიც უკმაყოფილებას გამოთქვამენ ამ საკითხის გამო და არა მხოლოდ ამაზე. საპარლამენტო უმრავლესობის ლიდერები ამბობენ, რომ ხელისუფლების მისამართით ბევრი კითხვა დაგროვდა და საჭიროა აღმასრულებელმა ხელისუფლებამ კითხვებზე პასუხი გასცეს. ერთ მნიშვნელოვან ინფორმაციასაც გეტყვით, რომ კოალიცია „ქართულ ოცნებაში“ უკვე ღიად ლანძღავენ ერთმანეთს და არ იშურებენ შეურაცხმყოფელ ეპითეტებს. მათ გადარჩენისთვის ბრძოლა დაიწყეს და ემიჯნებიან ყველა ისეთ ფიგურას, ვინც სკანდალშია გახვეული. ის რომ ქალაქის მერს დავით ნარმანიასა და კახი კალაძეს შორს უსიამოვნებაა, ეს დადასტურდა 12 სექტემბერს, როცა კახეთის გზატკეცილზე სავაჭრო და გასართობი ცენტრი „ისთ ფოინთი“ გაიხსნა. ასეთ მნიშვნელოვან ღონისძიებას დავით ნარმანია არ დაესწრო, რამაც გააძლიერა ეჭვი მათ შორის უთანხმოებაზე.“- წერს „ალია“ .