მთავრობის ადმინიტრაცია ადამიანის უფლებათა დაცვის საკითხებზე NGO- ებს შეხვდა

პოლიტიკა - 16:13, 11 Sep, 2015

1441

საქართველოს მთავრობის ადმინისტრაციის ადამიანის უფლებათა დაცვის სამდივნოს ორგანიზებით, დღეს არასამთავრობო და საერთაშორისო ორგანიზაციების წარმომადგენლებთან შეხვედრა გაიმართა. შეხვედრაზე ადამიანის უფლებათა დაცვის სამთავრობო სამოქმედო გეგმის განახლება/შემუშავების საკითხებზე და ამ პროცესებში არასამთავრობო სექტორის ჩართულობის მნიშვნელობაზე იმსჯელეს.

შეხვედრაზე, რომელიც 2 საათი გაგრძელდა, დაისახა ადამიანის უფლებათა დაცვის სამდივნოსა და არასამთავრობო სექტორს შორის შემდგომი თანამშრომლობის პერპექტივები სამოქმედო გეგმის განახლების პროცესში. შეხვედრის დიდი ნაწილი დისკუსიას დაეთმო.

მთავრობის ადმინისტრაციის ადამიანის უფლებათა დაცვის სამდივნომ, ამა წლის ივნისიდან, 2016-2017 წლებისათვის სამთავრობო სამოქმედო გეგმის განახლება/შემუშავების პროცესი დაიწყო, რომლის ფარგლებშიც, მომზადდა სამოქმედო გეგმის პირველადი სამუშაო ვერსია, შემდგომი კონსულტაციებისა და სრულყოფისათვის. ადამიანის უფლებათა დაცვის ეროვნული სტრატეგია (2014-2020) და მისი შესრულების სამთავრობო სამოქმედო გეგმა (2014-2015), შესაბამისად პარლამენტისა და მთავრობის მიერ დამტკიცებულ იქნა 2014 წელს.