თბილისის მერის მოადგილე ირაკლი ლექვინაძე საერთაშორისო ეკონომიკურ ფორუმზე სიტყით გამოვიდა

პოლიტიკა - 15:31, 11 Sep, 2015

1831

მერის მოადგილე ირაკლი ლექვინაძე კრინიცას 25-ე საერთაშორისო ეკონომიკურ ფორუმს დაესწრო. ლექვინაძე სიტყვით გამოვიდა ფორუმის ფარგლებში გამართულ პანელზე - ,,ეკონომიკური თანამშრომლობა და ინტეგრაცია სამხრეთ კავკასიაში : ოცნება თუ რეალობა?!".

სიტყვით გამოსვლისას მერის მოადგილემ საქართველოში მიმდინარე გეოპოლიტიკურ პროცესებსა და ევროპაში ინტეგრირების საკითხებზე ისაუბრა, ასევე, ყურადღება გაამახვილა რეგიონში ეკონომიკური და კულტურული მიმართულებით თანამშრომლობის აუცილებლობასა და საქართველოს როლზე აღნიშნული ურთიერთობების გაღრმავებაში. ამავე პანელის ფარგლებში საკრებულოს თავმჯდომარე გიორგი ალიბეგაშვილმა საქართველოსა და თბილისის ტურისტულ პოტენციალზე მოხსენება წარადგინა. ფორუმს, საკრებულოს წევრებთან ერთად, თავდაცვის მინისტრი თინა ხიდაშელი, სახელმწიფო მინისტრი ევროპულ და ევროატლანტიკურ სტრუქტურებში ინტეგრაციის საკითხებში დავით ბაქრაძე და ეკონომიკისა და მდგრადი განვითარების სამინისტროს ინოვაციების და ტექნოლოგიების სააგენტოს თავმჯდომარე ირაკლი ქაშიბაძეც ესწრებოდნენ.

ვიზიტის ფარგლებში მერის მოადგილე და თბილისის საკრებულოს წევრები საერთაშორისო ეკონომიკური ფორუმის პრეზიდენტსა და ორგანიზატორებსაც შეხვდნენ. ირაკლი ლექვინაძის განცხადებით, შეხვედრის ფარგლებში შეთანხმდნენ, რომ შემდგომ ეკონომიკურ ფორუმზე თბილისი უფრო მასშტაბურად, ადგილობრივი პროდუქციითა და კულტურით იქნება წარმოდგენილი. ლექვინაძე თბილისის საკრებულოს წევრებთან ერთად, პოლონეთის ქალაქ კრაკოვის მერიის ხელმძღვანელებსაც შეხვდა.

კრინიცას 25-ე საერთაშორისო ეკონომიკური ფორუმი პოლონეთში ყოველწლიურად იმართება. წელს, რიგით 25-ე, კონფერენციას მსოფლიოს 60 ქვეყნიდან 3 000-ზე მეტი სტუმარი ესწრებოდა.