დისკრედიტაციული ქმედება "ნაციონალების" მხრიდან - გიორგი არეშიძე ბრალდებებს პასუხობს

პოლიტიკა - 11:58, 11 Sep, 2015

3515

ქალაქ თბილისის მერიის განათლების, სპორტისა და ახალგაზრდულ საქმეთა საქალაქო სამსახურის უფროსი გიორგი არეშიძე მის წინააღმდეგ გავრცელებულ ინფორმაციას სიცრუეს უწოდებს.

როგორც დღეს გამართულ ბრიფინგზე არეშიძემ განაცხადა, აღნიშნულ ინფორმაციებს „ნაციონალური მოძრაობა“ მას მიზანიმიმართულად უვრცელებს.

არეშიძის თქმით, მზად არის გამოძიებას და ყველა დაინტერესებულ პირს ბანაკის ორგანიზებისთვის დახარჯული თანხების შესახებ დეტალური ინფორმაცია მიაწოდო.

„თბილისის მერიის მხრიდან ბანაკის ორგანიზებისთვის გადარიცხულ თითოეულ ლარზე ვარ პასუხისმგებელი. საკითხთან დაკავშირებით, დაინტერესებულ პირებს შემიძლია დეტალური ინფორმაცია მივაწოდო. ამასთან , ხაზგასმით მინდა აღვნიშნო, რომ ბანაკის ორგანიზებისას, სამართლებრივ ნაწილში, კანონის დარღვევასთან, მინიმალურ გადაცდომასთანაც კი საქმე არ გვქონია. რაც შეეხება შინაარსობრივ ნაწილს, ბანაკმა ჩაიარა იდეალურად და სწორედ, ეს გახდა ნაციონალური მოძრაობის გაღიზიანების მიზეზი - ისინი გამუდმებით ცდილობენ, დედაქალაქის მთავრობის მიერ განხორციელებულ ყველა წარმატებულ პროექტს მსგავსი მეთოდებით დაუპირისპირდნენ“ - განაცხადა გიორგი არეშიძემ.

თბილისის მერიის განათლების, სპორტისა და ახალგაზრდულ საქმეთა საქალაქო სამსახურის უფროსის განცხადებით, გაჟღერებული ვერსია, თითქოს, მან ხელშეკრულება მეგობარს გაუფორმა, სიცრუეა და არეშიძე გივი კუბლაშვილისგან ბოდიშის მოხდას ითხოვს.

„ბუნებრივია, მყავს ძალიან ბევრი ნაცნობი, ახლო ადამიანი, მეგობარი და საქმიანი კავშირები არასოდეს ყოფილა ამ ურთიერთობების ხელისშემშლელი ფაქტორი. თუნდაც, ბანაკში მე გავიცანი ძალიან ბევრი კარგი ახალგაზრდა, ზოგიერთ მათგანთან დავმეგობრდი კიდეც - ბუნებრივია, სამომავლოდ ეს ვერ გახდება მათთან საქმიანი კავშირების გამორიცხვის მიზეზი “ - განაცხადა არეშიძემ.

გიორგი არეშიძეს დიდი რაოდენობით საბიუჯეტო თანხის გაფლანგვასა და მითვისებაში ადანაშაულებენ. აღნიშნულთან დაკავშირებით „ფრეშ ნიუსმა“ სიუჟეტი მოამზადა. არეშიძის საქმიანობის შესახებ გამოძიების დაწყების მიზნით პროკურატურაში განცხადებაც შევიდა. მერიიდან გამოთხოვილი დოკუმენტები არასამთავრობო ორგანიზაცია "მედიატორმა" შეისწავლა.

გიორგი არეშიძე ვიცე-პრემიერის კახი კალაძის მეუღლის, ანუკი არეშიძის ძმაა.