აჭარა დალიანის მუნიციპალიტეტთან სხვადასხვა მიმართულებით ითანამშრომლებს

პოლიტიკა - 11:44, 11 Sep, 2015

723

დალიანის მუნიციპალიტეტსა და აჭარის ავტონომიურ რესპუბლიკას შორის ურთიერთთანამშრომლობის მემორანდუმი გაფორმდა, რომელიც სხვადასხვა მიმართულებით თანამშრომლობას გულისხმობს.

„მინდა ვთქვა, რომ ჩვენს ქვეყნებს შორის ურთიერთობის ახალი ფაზა იწყება. ისტორიული ფაზა, ორ რეგიონს შორის დამეგობრება, რაც გულისხმობს თანამშრომლობას სხვადასხვა მიმართულებით: განათლება, კულტურა, სპორტი, ასევე ტურიზმი. აუცილებლად იქნება წინ წამოწეული სავაჭრო ურთიერთობები, სოფლის მეურნეობის მიმართულებით თანამშრომლობა. ეს მემორანდუმია, რომელიც ითვალისწინებს რამდენიმე კონკრეტულ საკითხს,“ - განაცხადა არჩილ ხაბაძემ მემორანდუმის ხელის მოწერის შემდეგ.

ოქტომბერში დაგეგმილია დალიანის ხელმძღვანელების რამდენიმე ვიზიტი აჭარაში. დალიანსა და აჭარის რეგიონში შეიქმნება კომისიები, რომლებიც სხვადასხვა მიმართულებით ითანამშრომლებენ, მოხდება ახალი პროექტების წამოწევა, რაც ნაყოფიერ და შედეგიან თანამშრომლობაზე იქნება დაფუძნებული.

„საქართველო იქნება პირველი ქვეყანა რეგიონში, არა მხოლოდ კავკასიაში, არამედ ევროპულ ნაწილშიც, რომელსაც ჩინეთთან ექნება თავისუფალი ვაჭრობა. ეს ქვეყანას მოუტანს დიდ სარგებელს. პირველ რიგში ეს არის ღვინის ექსპორტი, ასევე სხვა პროდუქციის ექსპორტი. ქართველ მეწარმეს გაუადვილდება პროდუქციის შეტანა ჩინეთში. აღნიშნული გადაწყვეტილება გააუმჯობესებს ორი ქვეყნის ურთიერთობებს და მას სხვა ეტაპზე გადაიტანს. ეს სერიოზულ წვლილს შეიტანს ჩვენი ქვეყნის ეკონომიკის განვითარებაში,“– განაცხადა ირაკლი ღარიბაშვილმა.

ჩინეთში ვიზიტით მყოფმა პრემიერმინისტრმა ქართველ ჟურნალისტებთან აღნიშნული გადაწყვეტილების მნიშვნელობაზე ისაუბრა. დალიანის მუნიციპალიტეტის ხელმძღვანელის განცხადებით, ერთობლივი პროექტები მომავალშიც გაგრძელდება. მისივე თქმით, მემორანდუმის ხელმოწერის ცერემონიაზე საქართველოს პრემიერმინისტრის დასწრება არის დასტური ორ ქვეყანას შორის ახალი, დინამიური თანამშრომლობის დასაწყისის. დალიანის მუნიციპალიტეტსა და აჭარის ავტონომიურ რესპუბლიკას შორის გაფორმებული ურთიერთთანამშრომლობის მემორანდუმი მიზნად ისახავს ქართველი და ჩინელი ხალხის დაახლოებას, ურთიერთობების გაღრმავებას ეკონომიკის, სოფლის მეურნეობის, ჯანდაცვის, განათლების, კულტურის, ტურიზმის და ქალაქის დაგეგმარების მიმართულებით.