საქართველოს "საზღვაო ტრანსპორტის სააგენტოს" დირექტორმა თურქეთში გამართულ ღონისძიებებში მიიღო მონაწილეობა

პოლიტიკა - 12:49, 09 Sep, 2015

1266

2015 წ. 4 - 5 სექტემბერს თურქეთის რესპუბლიკაში (ქ. სტამბოლში) თურქეთის ტრანსპორტის, საზღვაო საქმეთა და კომუნიკაციების სამინისტროს ეგიდით თურქეთის წამყვანი საზღვაო საინფორმაციო სააგენტოს Deniz Haber Ajansi-ის ორგანიზებით გაიმართა მაღალი დონის ღონისძიება - "ოქროს ღუზა - საზღვაო სფეროში მიღწევებისთვის მე -10 საერთაშორისო დაჯილდოების ცერემონია".

ღონისძიებას საქართველოდან ესწრებოდა ეკონომიკისა და მდგრადი განვითარების სამინისტროს სსიპ "საზღვაო ტრანსპორტის სააგენტოს" დირექტორი -კაპიტანი მამუკა ახალაძე; ასევე ესწრებოდნენ საერთაშორისო საზღვაო ორგანიზაციის (IMO) 60 წევრი ქვეყნის და 15 სხვადასხვა საერთაშორისო ორგანიზაციის წარმომადგენლები.

დაჯოლდოების ცერემონიაზე გადაცემული იყო 15 ჯილდო 8 კატეგორიაში, სადაც ერთ-ერთ ნომინაციაში ჯილდო სიმბოლურად გადასცა კაპიტანმა მამუკა ახალაძემ.

კონფერენციის ფარგლებში სააგენტოს დირექტორმა გამართა შეხვედრები თურქეთის ტრანსპორტის, საზღვაო საქმეთა და კომუნიკაციების მინისტრის მოდაგილესთან კაპიტან ოზგანპოირაზთან თურქეთსა და საქართველოს შორის მეზღვაურთა სერტიფიკატების ურთიერთაღიარების მემორანდუმის ხელმოწერის პერსპექტივის განსახილველად, სადაც თურქეთის მხარემ გამოთქვა სრული მზადყოფნა მემორანდუმის ხელმოსაწერად. ასევე შეხვედრა შედგა თურქეთის გემფლობელთა ასოციაციის მმართველი საბჭოს წარმომადგენელთან კაპიტან ალევ ტუნჩთან ქართული დროშის ქვეშ გემების მოზიდვის პერსპექტივებისა და ქართველ მეზღვაურთა სამომავლო დასაქმების კუთხით. მას შემდეგ, რაც საქართველოს და თურქეთს შორის გაფორმდება ხსენებული მემორანდუმი ქართველ მეზღვაურებს გზა გაეხსნებათ თურქული დროშის ქვეშ მცურავ გემებზე დასაქმების მხრივ.

აღნიშნული ღონისძიება იქცა ძალიან მნიშვნელოვან საერთაშორისო მოვლენად, რომელიც ყოველწლიურად აერთიანებს მსოფლიოს საზღვაო სფეროს მაღალი დონის წარმომადგენლებს.