არასაპარლამენტო ოპოზიცია და „თავისუფალ დემოკრატები“ ინტერპარტიული ჯგუფის შექმნას განიხილავენ

პოლიტიკა - 11:10, 09 Sep, 2015

1081

საარჩევნმო გარემოს გაუმჯობესების მიზნით ინტერპარტიული ჯგუფის შექმნის ინიციატივას არასაპარლამენტო ოპოზიცია დღეს „თავისუფალ დემოკრატებთან“ განიხილავს. მხარეები შეეცდებიან ბოლო დეტალები შეათანხმონ, რის შემდეგაც „თავისუფალი დემოკრატები“ საკითხს ბიუროს უახლოეს სხდომაზე დააყენებენ. არასაპარლამენტო და საპარლამენტო ოპოზიციაც თანხმდება იმ საკითხზე, რომ არსებული საარჩევნო სისტემის გასაუმჯობესებლად ინტერპარტიული ჯგუფის შექმნა აუცილებელია.

„შეიძლება ჩაითვალოს, რომ ინტერპარტიული ჯგუფის შექმნის შეთავაზება ჩვენი მხრიდან კომპრომისული ნაბიჯი იყო. პარლამენტში შექმნილი ჯგუფის ფორმატში ყველა ამ საკითხის განიხილვა უნდა მოხდეს. ინიცირებას მოახდენენ „თავისუფალი დემოკრატები“, როგორც საპარლამენტო ფრაქცია, თუმცა საეჭვოა ამ ხელისუფლებას ინტერპარტიული ჯგუფის შექმნის სურვილიც თუ ექნება.“ - განაცხადა „ეროვნულ-დემოკრატიული“ პარტიის ლიდერმა ბაჩუკი ქარდავამ.

„თავისუფალი დემოკრატების“ წევრის ირაკლი ჩიქოვანის განცხადებით, ისეთ საკითხებს, როგორიც საარჩევნო სისტემაა მხლოდ ერთი პარტია არ უნდა წყვეტდეს, არამედ ფართო კონსენსუსის შედეგი უნდა იყოს.

„ისეთი მნიშვნელოვანი საკითხები, როგორიც არის საარჩევნო სისტემა არის ფართო კონსენსუსის საკითხი და არა ის რომ ერთი ძალა და ამ შემთხვევაში „ქართული ოცნება“ წყვიტავდეს, თუ როგორ უნდა ჩატარდეს 2016 წლის არჩევნები. აქედან გამომდინარე ჩვენ უახლოეს მომავალში მოვახდენთ საკითხის ინიცირებას, რომელზეც არასაპარლამენტო ოპოზიციასთან შევჯერდებით. უკვე ამ კვირის განმავლობაში შევა პარლამენტში განსახილველად და უახლოეს ბიუროს სხდომაზე იქნება განხილული“- განაცხადა ირაკლი ჩიქოვანმა.