მას შემდეგ, რაც „იმედმა“ არხიდან ინგა გრიგოლია გაუშვა ჟურნალისტი საქართველოს პრეზიდენტ გიორგი მარგველაშვილს ესაუბრა.

როგორც ტელეწამყვანმა „რუსთავი 2“-ის ეთერში განაცხადა, პირველი ადამიანი იყო მარგველაშვილი, ვისაც „რეაქციის“ დახურვის შესახებ მოკლეტექსტური შეტყობინება გაუგზავნა.

„გიორგი მარგველაშვილი იყო პირველი ადამიანი, რომელსაც მესიჯად მივწერე ის რაც მოხდა, ასე ჩავთვალე საჭიროდ. მან დამირეკა და ძალიან გაუკვირდა. მე პრეზიდენტს ძალიან დიდ პატივს ვცემ, მერე ვთქვი კიდეც, როგორ ვნანობ, რომ თავის დროზე, როგორც ამომრჩეველმა არ მივიღე მონაწილეობა არჩევნებში და მას არ მივეცი ხმა. თუ ის ხელმეორედ დააყენებს კანდიდატურას ჩემს ხმას აუცილებლად მიიღებს, იმიტომ რომ ის იყო ადამიანი, რომელმაც გადმორეკა მომისმინა და ძალიან მკვეთრი განცხადებაც გააკეთა“,- აღნიშნა ინგა გრიგოლიამ გადაცემა „არჩევნში“ ჩართვისას.

რაც შეეხება ეთერში დაბრუნების თარიღს, გრიგოლია ამბობს, რომ ის „წყენის, გაბრაზების გადასვლამდე“ დაისვენებს, თუმცა მისი თქმით, პაუზა ხანგრძლივი არ იქნება.

„არ მიმაჩნია სწორად, ერთი ორი ან სამი თვის განმავლობაში განვაახლო თოქ-შოუ, რადგან ძალიან ნაწყენი ვარ და ალბათ ვერ ვიქნები ობიექტური, როგორსაც ყოველთვის ვცდილობდი ვყოფილიყავი. ამიტომ ერთი-ორი თვე დავისვენებ... ნაადრევია სიხარული, წინასაარჩევნოდ მე დავბრუნდები პირდაპირ ეთერში", -მიმართა ინგა გრიგოლიამ იმ ადამიანებს, რომლებიც ჟურნალისტის თქმით, გახარებულნი არიან "რექაციის" დახურვით.