"ეს სოლოლაკში გადაწყდა, მეგობრებო, ორი წლის მერე ოპოზიციაში იქნებით და გაიხსენებთ"- გრიგოლია

პოლიტიკა - 23:04, 08 Sep, 2015

5730

ჟურნალისტ ინგა გრიგოლიას თქმით, მისთვის გაუგებარია იმ მადლობების ფონზე, რაც ის „იმედის“ მენეჯმენტისგან იღებდა, რა მოხდა მისი აშშ-ში ყოფნის დროს, რომ ტელეკომპანიამ მისი გადაცემების დახურვა გადაწყვიტა.

„მე მაქვს ეჭვი, რომ მოხდა რაღაც, რადგან არცერთი გაფრთხილება ფორმატის შეცვლაზე ან სხვა თემაზე არ ყოფილა. ნომერ პირველი ეჭვი არის, რომ ეს არის პოლიტიკური გადაწყვეტილება. მინდა „ქართულ ოცნებას“ მივმართო, ძალიან ხშირად ნუ გააკეთებინებთ განცხადებას გოგი თოფაძეს, რადგან ხშირად რასაც შიგნით ამბობთ, ამ ადამიანს გარეთ გამოაქვს. მაქვს ასევე ერთი კითხვა რა იცის ბატონმა ვოლსკიმ, რა უნდა შესთავაზოს მაყურებელს ტელეკომპანია იმედმა“- განაცხადა ინგა გრიგოლიამ.

გრიგოლიას თქმით, ხელისუფლებას რამდენიმე ბერკეტი აქვს ტელეკომპანიაზე ზეწოლისთვის.

„ეს არის ბიზნესი, ხომ არ მოხდა ბიზნეს თემების დალაგება? შეიძლება არ უნდოდათ ხელისუფლებასთან საქმის გაფუჭება, ასევე როდესაც აშშ-ში ვიყავი ფეისბუკზე წავიდა ძალიან უცნაური კამპანია ოცნების ე.წ შავრაზმული ჯგუფების მხრიდან, სადაც სხვა ჟურნალისტებთან ერთობლივ ფოტოებზე წერდნენ, „ესენი არიან წასული ამერიკაში და რაღაცას გეგმავენ“. რა ქვეყანაში გვინდა ცხოვრება, სადაც ჩემი და გიორგი გაბუნიას ერთად გადაღებული სელფი ეჭვის საბაბი გახდება?“- განაცხადა ინგა გრიგოლიამ.

„რა ქვეყანაში გვინდა ცხოვრება, იმის ნაცვლად, რომ შენმა ტელევიზიამ სხვის აგრესიისგან და ზეწოლისგან დაგიცვას, ღამ-ღამობით დაგიდოს განცხადებები? მე მიმაჩნია, რომ ეს სოლოლაკში გადაწყდა."- აღნიშნა გრიგოლიამ.

"მე მინდა მივმართო იმ მედია ექსპერტებს, რომლებიც აცხადებენ, რომ არიან მედია ექსპერტები და იმ პოლიტიკოსებს, რომლებიც დღეს სახელისუფლებო გუნდს წარმოადგენენ. მეგობრებო, ძალიან ნუ „გააპრავებთ“ ამ ყველაფერს , ამას ქვია გადაცემების დახურვა, როგორც არ უნდა შეიფუთოს. ნუ „გააპრავებთ“, იმიტომ რომ ორი წლის მერე ზუსტად ისევე ხმამაღლა ილაპარაკებთ დღევანდელ რეალობაზე , როგორც მე ვლაპარაკობ ახლა. თქვენ კი, დიდი ნაწილი ვინც ახლა სახელმწიფო გუნდში ხართ, მე მგონია რომ ორი წლის მერე ოპოზიციაში იქნებით და გაიხსენებთ, როგორ დახურეს ორი თოქ შოუ 29 აგვისტოს ერთ წამში“- განაცხადა ინგა გრიგოლიამ გადაცემა "არჩევანში".