რელიგიის საკითხთა სახელმწიფოს სააგენტოს ხელმძღვანელი ზაზა ვაშაყმაძე აზერბაიჯანის ელჩს შეხვდა, სადაც ქურმუხის წმინდა გიორგის ტაძარში გადაღებულ კლიპზე ისაუბრეს.

როგორც შეხვედრის დასრულების შემდეგ ვაშაყმაძემ განაცხადა, აღნიშნულ საკითხზე პოზიციას ოფიციალური ბაქო დააფიქსირებს.

„რაც მოხდა დასაგმობი და მიუღებელია. ჩემი კოლეგის მხრიდან მოხდება ბაქოს ხელისუფლებასთან პოზიციის შეთანხმება. ჩვენი ინფორმაციით, ჩემი აზერბაიჯანელი კოლეგა ამ დროისთის საფრანგეთში იმყოფება და როდესაც სამშობლოში დაბრუნდება მ საკითხს მიხედავს. ამის შემდეგ მოხდება სახელმწიფო დონეზე პოზიციის საფიქსირება“, - განაცხადა ზაზა ვაშაყმაძემ.

კლიპთან დაკავშირებით გუშინ განცხადება საპატრიარქომაც გაავრცელა. როგორც განცხადებაშია აღნიშნული, საპატრიარქო ტაძარში კლიპის გადაღების ფაქტის გამოძიებას ითხოვს.

"ინტერნეტ სივრცეში ახლახან გავრცელდა ე.წ. კლიპი, თუ მხატვრული ფილმის ნაწილი, რომელიც გადაღებულია ისტორიული ჰერეთის, დღევანდელი აზერბაიჯანის ტერიტორიაზე მდებარე უმნიშვნელოვანესი ქართული სალოცავის - ქურმუხის წმინდა გიორგის ტაძარში.

სცენა დაახლოებით ასეთია: უცნობი კაცი და ქალი, რაღაც განძის ხელში ჩაგდების სურვილით შეპყრობილნი, ორ კათოლიკე ბერს ჯოხის თავში ჩარტყმით გონებას დააკარგვინებენ, მათ სამოსს ჩაიცვამენ და ტაძარში შევლენ. სამალავში სანუკვარ ნივთს მიაგნებენ. ქალი ნივთთან ერთად გაიქცევა, მამაკაცი კი დარჩება და შემოსულ სხვა სასულიერო პირებს (კათოლიკე ბერების ჩაცმულობით) აღმოსავლური საბრძოლო ხელოვნებით მოიგერიებს.

ეს ყველაფერი კი ხდება ეკლესიაში და მის ცენტრალურ ადგილში, საკურთხეველში, რაც სრული უგულვებელყოფაა ათასობით და ათიათასობით ადამიანის რელიგიური გრძნობისა.

ამ კადრების გადამღებებმა სათამაშო მოედნად აქციეს ის სივრცე, რომელიც, როგორც მართლმადიდებლებისთვის, ისე მუსლიმებისთვისაც კი უდიდესი თაყვანისცემის ადგილია. აქ ხომ საუკუნეებია კრძალვით, ფეხშიშველნი მოდიან მორწმუნენი, რათა ცრემლით შესთხოვონ წმინდა გიორგის ღვთის წინაშე მეოხება.

საქართველოს საპატრიარქო მიმართავს როგორც საქართველოს, ისე აზერბაიჯანის ხელისუფალთ, სასწრაფოდ გამოიძიონ ეს ფაქტი და დროულად მიიღონ სათანადო ზომები მომხდარის გამო", - ნათქვამია განცხადებაში.