"ლეიბორისტებიდან" ენმ-ში და შემდეგ ოცნებაში - მეჭიაურის პოლიტიკური ფერისცვალებები

პოლიტიკა - 16:05, 08 Sep, 2015

3269

„ლეიბორისტული პარტიის“ წევრი გიორგი გუგავა, გაზეთ „რეზონანსთან“ საპარლამენტო უმრავლესობის წევრის თამაზ მეჭიააურის შესახებ საუბროსბ, მისი თქმით მეჭიაური პარტიებს ხშირად იცვლიდა და საქართველოში არ დარჩენილა პოლიტიკური პარტია, მისი წევრი რომ არ ყოფილიყო.

„თამაზ მეჭიაური ნამდვილად იყო ლეიბორისტულ პარტიაში 1997- დან 2003 წლამდე. ჩვენამდე და ჩვენს შემდეგაც ის ასევე სხვადასხვა პოლიტიკურ პარტიებში მოღვაწეობდა. მას მრავალი პარტია აქვს მოვლილი. ჩვენგან „ნაციონალურ მოძრაობაში“ გადავიდა. ეს კაცი პარტიებში მონავარდე ადამიანია, ის პოლიტიკურ შეხედულებას იმის მიხედვით იცვლიდა, თუ ვის ქონდა ხელისუფლებაში მოსვლის შანსი. 2003 წელს ჩვენი პარტიის მეშვეობით პარლამენტში თიანეთის მაჟორიტარ დეპუტატად გავიდა. მოსახლეობამ იგი შალვა ნათელაშვილის ავტორიტეტის გამო აირჩია. მაგრამ სამწუხაროდ ვარდების რევოლუციის შემდეგ ბატონი მეჭიაური გადასხვაფერდა და „ნაციონალურ მოძრაობაში“ გადავიდა. ამის შემდეგ მას სააკაშვილის ხელისუფლების დროს მაღალი თანამდებობები ეკავა“ - აცხადებს გუგავა.

გუგავას თქმით, მეჭიაურსა და რესპუბლიკელებს შორის დაპირისპირება ივანიშვილის მხრიდან მოდის და მეჭიაური ბიძინა ივანიშვილის აზრების გამხმოვანებელია.

„ახლა აღმოაჩინა რომ პრეზიდენტი და „რესპუბლიკელები“ ყოფილი „ემჯეოშნიკები“ არიან? რესპუბლიკელებთან ბიძინა ივანიშვილის დაპირისპირება, რომელსაც მეჭიაურის პირით ახმოვანებს, განპირობებულია მათი მოძლიერებით. ოლიგარქის კარზე დიდი სიახლეებია, რადგან მათ განსაკუთრებული ამბიციები გაუჩნდათ. ივანიშვილის ირიბად თუ პირდაპირ მხილება რესპუბლიკელებმაც დაიწყეს. უსუფაშვილმა ფაქტიურად აღიარა, რომ ქვეყნის ფორმალური მმართველი ივანიშვილია. აქედან გამომდინარე, ეს ოლიგარქის სუსტმა ნერვებმა ვერ აიტანა და კოალიციის შიგნით არსებული დაპირისპირება მეჭიაურის მეშვეობით გარეთ გამოვიდა“ - აღნიშნა გიორგი გუგავამ.