გომელაურის პირველი კომენტარი სუს-ის თანამშრომლის დაკავებაზე

პოლიტიკა - 13:34, 08 Sep, 2015

5026

სახელმწიფო უსაფრთხოების სამსახურის ხელმძღვანელი ვახტანგ გომელაური სუს-ის თანამშრომლის გია არდაზიშვილის დაკავების ფაქტს ეხმაურება.

მისი თქმით, არდაზიშვილს საიდუმლო ინფორმაციაზე წვდომა არ ჰქონდა, რადგან სუს-ის რიგითი თანამშრომელი იყო.

„რაც შეეხება გია არდაზიშვილის თემას, ძალიან ბევრი მითქმა-მოთქმა გამოიწვია... მოგეხსენებათ, როცა მე წარდგენილი ვიყავი პარლამენტში და უნდა მომხდარიყო ჩემი დამტკიცება, იქ ბევრი კითხვა დაისვა. მაშინ საუბარი იყო, რომ ანალიტიკური სამსახურის ხელმძღვანელმა პირმა დატოვა საქართველო და წაიღო, ასე ვთქვათ, საიდუმლო ინფორმაცია, გადაიტანა სხვა სახელმწიფოს სპეცსამსახურებთან. არდაზიშვილი არის რიგითი თანამშრომელი, რომელიც მუშაობდა ღია წყაროებსა და მოკვლევაზე, ანალიზის გაკეთებაზე და აწვდიდა ხელმძღვანელობას, მას არანარი წვდომა არ ჰქონდა საიდუმლო ინფორმაციაზე. იმ დროისთვის გამოძიება დაწყებული იყო და მიმდინარეობდა მისი დაკავების ოპერაცია, აქედან გამომდინარე, ჩვენ ვერანაირ განცხადებას ვერ გავაკეთებდით და გიორგი ბარამიძე კარგად მიხვდა, მე რომ ავუხსენი, ის იყო შს მინისტრი და მან გაიგო, მე რაზე ვსაუბრობდი. არ შეიძლებოდა ამ განცხადების გაკეთება, რომ ჩვენი სპეცსამსახურის თანამშრომელმა მიატოვა და გადავიდა სხვა ქვეყანაში. მინდა ხაზი გავუსვა, განცხადებები გაკეთდა მათი მხრიდან, თითქოსდა ის არა ჩვენ, არამედ რუსულმა სპეცსამსახურებმა, ოსურმა სპეცსამსახურებმა სცემეს, დააკავეს და გადმოაგდეს ე.წ. საოკუპაციო ზოლზე. როგორ წარმოგიდგენიათ თქვენ, რომ ადამიანი გადავიდეს, გადაუტანოს ღირებული ინფორმაცია და ის ადამიანი სცემონ, გაკოჭონ, აუხვიონ თვალები, ფეხებით დააბან და გადმოაგდონ ისევ უკან... ეს მე მგონი ლოგიკაში არ ჯდება და კითხვები მოხსნილია..“- განაცხადა ვახტანგ გომელაურმა.

სახელმწიფო უსაფრთხოების სამსახურის უფროსის თქმით, არდაზიშვილი ქართველმა სამართალდამცველებმა დააკავეს და მიმდინარეობს გამოძიება.

„ჩატარდა ღონისძიება, დეტალებში მე ვერ ჩავალ და ვერ მოვყვები. გამოძიება მიმდინარეობს, მას რამდენიმე მუხლი აქვს წაყენებული და ის დღესდღეობით დაკავებულია“ - განაცხადა ვახტანგ გომელაურმა

არდაზიშვილი კონტრდაზვერვის სამსახურმა გუშინ სისხლის სამართლის კოდექსის რამდენიმე მუხლის საფუძველზე დააკავა.

შეგახსენებთ, არდაზიშვილის დაკავების შესახებ ინფორმაცია თავდაპირველად „ნაციონალურმა მოძრაობამ“ გაავრცელა. მათი თქმით, სუს-ის თანამშრომელმა ქვეყნიდან მნიშვნელოვანი ინფორმაცია გაიტანა.

"2 სექტემბერს, საოკუპაციო ხელისუფლების წარმომადგენლებმა გადმოაგდეს ეს პიროვნება საქართველოს მიერ კონტროლირებად ტერიტორიაზე და მიატოვეს. ის იყო ნაცემი. ამჟამად ის კონტრდაზვერვის დეპარტამენტს ჰყავს დაკავებული“, - განაცხადა გივი თარგამაძემ და შსს-ს მოუწოდა უპასუხოს კითხვებს - როგორ მოახერხა მან ინფორმაციაზე წვდომა და მისი ქვეყნიდან გატანა, ასევე დაისაჯნენ თუ არა შესაბამისი პირები", - აცხადებენ ენმ-ში.