საარჩევნო სისტემის გაუმჯობესებაზე საპარლამენტო და არასაპარლამენტო ოპოზიცია ერთად იმსჯელებს

პოლიტიკა - 10:05, 08 Sep, 2015

1819

გაერთიანებული ოპოზიციის ფორმატში დღეს არასაპარლამენტო და საპარლამენტო ოპოზიციის შეხვედრა გაიმართება, რომელზეც საარჩევნო გარემოს გაუმჯობესებაზე იმსჯელებენ. განხილვის სამი ძირითადი საკითხი - კონსტიტუციაში შესატანი ცვლილებები, 16 ოქტომბრის შუალედური არჩევნების ბოიკოტირება და პარლამენტში ინტერპარტიული ჯგუფის შექმნა იქნება. საპარლამენტო და არასაპარლამენტო ოპოზიციის განცხადებით, ისინი საარჩევნო სისტემის გაუმჯობესებასთან დაკავშირებით, მასშტაბურ კამპანიას გეგმავენ, მთავარი მოთხოვნები კი მაჟორიტარული არჩევნების გაუქმება და 2016 წლისთვის საპარლამენტო არჩევნების პროპორციული სისტემით ჩატარება. ამ მიზნით ოპოზიციამ შესაძლოა ხელმოწერების შეგროვებაც დაიწყოს.

„ჩვენი მოთხოვნა არის მარტივი, უნდა შეიცვალოს საარჩევნო სისტემა, უნდა გაუქმდეს მაჟორიტარები.მე დარწმუნებული ვარ, რომ თუ ჩვენს წინაშე დადგება საკონსტიტუციო ცვლილებებთან დაკავშირებით ხელმოწერების შეგროვება, საზოგადოების მხიდან პრობლემა არ იქნება.“- განაცხადა ედპ-ს ლიდერმა ბაჩუკი ქარდავამ.

„თავისუფალი დემოკრატების“ წარმომადგენლის განცხადებით, ოცნება ოპოზიციასთან დიალოგზე უარს აცხადებს:

„ქართულ ოცნებას არ უნდა დიალოგი ოპოზიციურ ძალებთან და გადავწყვიტეთ ვკითხოთ ხალხს, რა უნდა“- განაცხადა „თავისუფალი დემოკრატების“ წევრმა გიორგი ცაგარეიშვილმა.

ნაციონალური მოძრაობის აღმასრულებელი მდივნის სერგო რატიანის განცხადებით, დღევანდელი შეხვედრის მიზანი იმ სამოქმედო გეგმაზე შეთანხმებაა, რომლითაც ოპოზიცია ხელისუფლებას აიძულებს, არჩევნები სამართლიანი სისტემით ჩაატაროს.