ოდესის ოლქის გუბერნატორის, მიხეილ სააკაშვილის მიერ ბიზნესმენისა და დნეპროპეტროვსკის ოლქის ყოფილი ხელმძღვანელის, იგორ კოლომოისკის მიმართ გამოთქმულ კრიტიკაზე, კოლომოისკის პასუხს, მიხეილ სააკაშვილი გამოეხმაურა.

"შემთხვევითობად არ ვთვლი, რომ ჩემ მიერ პრემიერ-მინისტრის კრიტიკაზე რეაგირება მთავარმა ოლიგარქმა მოახდინა და ოლიგარქიული მედიიდან ისტერიული შეტევებიც დაიწყო.

ოლიგარქები, სახელმწიფოს დასუსტებით ფულს შოულობენ. და ყველაფერს აკეთებენ იმისთის, რომ სახელმწიფომ დასუსტება განაგრძოს. თუკი მთავრობას ნამდვილად სურს ძლიერი უკრაინა, საჯაროდ უნდა გაემიჯნოს ოლიგარქებს, შეცვალოს სამეთვალყურეო საბჭო და სახელმწიფო საკუთრებაში არსებული საწარმოების დირექტორები, რომლებიც ოლიგარქების მიერ არიან დანიშნულები. ჯერჯერობით, ყველაფერი საპირისპიროდ კეთდება. ილიჩევსკის პორტის დირექტორის, კრუკის გათავისუფლების შემდეგ კონკურსი დაინიშნა. რომეშიც, როგორც გავიგემ კვლავ კრუკმა გაიმარჯვა“ - წერს სააკაშვილი.

შეგახსენებთ, რამდენიმე დღით წინ, ოდესის ოლქის გუბერნატორმა უკრაინის პრემიერ-მინისტრი, არსენი იაცენუკი ოლიგარქების ინტერესების დაცვაში დაადანაშაულა. სააკაშვილის თქმით, ოდესაში ავიაბილეთებზე ფასი ხელოვნურად გაზრდილია, ფასებს კი ერთი ოლიგარქი აკონტროლებს. ამ საკითხში კი პრემიერი არსენ იაცენუკი ოლიგარქ კოლომოისკის ინტერესებს იცავს. რასაც კოლომოისკი გამოეხმაურა:

„მე ვთვლი, რომ აზრი არ აქვს რამეზე პასუხი მოსთხოვო ნარკომანს, სანამ ის წამალზე დამოკიდებულების საწინააღმდეგო რეაბილიტაციის კურსს არ გაივლის. ჩემი ხაზი გარკვეულია - მე მას სასამართლოში შევხვდები, სადაც ჩემს პატივსა და ღირსებას დავიცავ და მატრიალურ კომპენსაციას მოვითხოვ. სააკაშვილმა განაცხადა, რომ მას ხელფასი 200 ათასი დოლარი აქვს, გადაიხადოს თავისი ხელფასიდან“- აღნიშნა კოლომოისკიმ.