საზოგადოება „ივერიას“ წევრი ნიკა რურუა სოციალურ ქსელში წერს, რომ რუსეთი-საქართველოს ურთიერთობაზე წერს.

მისი თქმით, რუსეთმა იცის, რომ ვერანაირ პრორუსულ ხელისუფლებას საქართველოში დიდი ხნის სიცოცხლე არ უწერია, ამიტომ ის ქვეყანაში არეულობას მუდმივად შეეცდება.

„რუსეთმა დაკარგა უკრაინა. საბოლოოდ. მიუხედავად იმისა რომ მიიტაცა ყირიმი. და ახლა ის უკრაინის მაქსიმალურად არევ-დარევას ცდილობს.

ისტორიულად ეს მას გამოსდიოდა იმ ქვეყნებში, სადაც ხალხი დაბნეული, არაერთსულოვანი და დაქსაქსული იყო. ერთი მაგალითი ამისა - ყირგიზეთია დღეს - სრულიად ფიქტიურად დამოუკიდებელი სახელმწიფო, სადაც რუსეთი დესტრუქციულ ქმედებას დესტრუქციულ ქმედებაზე ჩადის, რომ უფრო მეტ უიმედობასა და არეულობაში უფრო მეტხანს დარჩეს სიტუაციის ბატონ-პატრონად.

იგივეს ეცდება რუსეთი საქართველოშიც, რადგან კარგად ესმის, რომ მიიტაცა რა აფხაზეთი და სამაჩაბლოდ (ისიც დროებით), მან სამუდამოდ და საბოლოოდ დაკარგა საქართველო.

ამიტომ, რუსეთი აქ მხოლოდ დესტრუქციას, არეულობას ეცდება, რადგანაც იცის, რომ ვერანაირ პრორუსულ ხელისუფლებას აქ დიდი ხნის სიცოცხლე არ უწერია, რადგანაც ჩვენმა ქვეყანამ გაიგო და იგრძნო თავისუფლების და მის მიერ მოტანილი ღირსების გემო და სიკეთე - თუნდაც სულ საწყის, ელემენტარულ დონეზე.

შესაბამისად, არაფრით არ უნდა დავუშვათ თუნდაც მცირედი შანსი გათიშულობის, უიმედობის და დაქსაქსულობისა თავისუფლების მომხრე ადამიანებში და პოლიტიკურ ძალებში. ხალხის მობილიზაციის პირობებში რუსეთი უძლური ხდება და ესეც ისტორიამ უამრავჯერ დაგვიდასტურა, როგორც “ვარდების რევოლუციის”, ისე ასლანის მიერ დაპატრონებული აჭარის საქართველოს კონსტიტუციურ სივრცეში დაბრუნებისას.

პროტესტიც კი, თუ ის საჭირო გახდა და უდაოდ გახდება, უნდა იყოს უკიდურესად ორგანიზებული და დისტიპლინირებული. არანაირი შანსი არ უნდა მიეცეთ სკამებზე მონადირეებსა და სხვებზე დომინირების მსურველებსაც, რადგანაც ამ ბრძოლას საქართველოსთვის მხოლოდ მაშინ მოვიგებთ, თუ მას თავისუფლების წმინდათაწმინდა მიზნის ქვეშ ვაწარმოებთ - ის ქვეყანა გარე ძალისგან ვერ იქნება თავისუფალი, რომელსაც საკუთარი მოქალაქეებისთვის არ უნდა თავისუფლება.“, - წერს რურუა.