არასაპარლამენტო ოპოზიცია საარჩევნო კოდექსში ცვლილებების შეტანის ვადის 2020 წლამდე გადაწევას აპროტესტებს. ეროვნულ- დემოკრატიული პარტიის თავმჯდომარის ბაჩუკი ქარდავას შეფასებით, ხარვეზებით სავსე კოდექსი და მედიაზე განხორციელებული შეტევა ერთ რეალობაში ქმნის ისეთ პირობებს, რომ 2016 წლისთვის ხელისუფლებას ლეგიტიმაციის პრობლემა შეექმნება.

„დაახლოებით ასეთი გზავნილია, რომ დემოკრატია მოიცლის 4-5 წელი და 2016 წელს არჩევნები უნდა ჩატარდეს ხარვეზებით სავსე საარჩევნო კოდექსით.“- აღნიშნა ბაჩუკი ქარდავამ, მისი თქმით არასაპარლამენტო ოპოზიციის მიზანი არა საარჩევნო კოდექსის სახით კარგი პროდუქტის შექმნა , არამედ ამ პროდუქტის რეალიზება და კანონმდებლობაში ასახვაა. ედპ-ს ლიდერის განცხადებით, ამ მიზნის მისაღწევად არასაპარლამენტო ოპოზიცია ყველა პოლიტიკურ ბერკეტს გამოიყენებს.

ბაჩუკი ქარდავას განცხადებით საარჩევნო კოდექსთან დაკავშირებულმა მოვლენებმა აჩვენა, რომ ამ საკითხზე, საპარლამენტო და არასაპარლამენტო ოპოზიციას, არასამთავრობო სექტორსა და საზოგადოებას შორის უპრეცენდენტო კონსოლიდირებაა, მაგრამ ამის მიუხედავად ხელისუფლება მაინც არ აპირებს გაითვალისწინოს მინიმალური მოთხოვნები, რომელიც სამართლიანი არჩევნებისთვის არის საჭირო.