სახეზეა ჩიხური სიტუაცია, საჭიროა სამმანდატიანი ოლქები

სახეზეა ჩიხური სიტუაცია, საჭიროა სამმანდატიანი ოლქები - ჯაფარიძე საარჩევნო სისტემაზე

პოლიტიკა - 11:57, 04 Sep, 2015

1665

"ახალი პოლიტიკური ცენტრი" საარჩევნო სისტემასთან დაკავშირებით პოლიტიკურ პარტიებს ახალ ინიციატივას სთავაზობს. ზურაბ ჯაფარიძის განცხადებით, საჭიროა ყველა პოლიტიკურმა პარტიამ დაიწყოს მსჯელობა სამმანდატიან საარჩევნო ოლქებზე, რაც მისივე განმარტებით, ხმის თანასწორების პრინციპის უზრუნველყოფას მოახდენს.
როგორც ჯაფარიძე ამბობს, საარჩევნო სისტემის არსებული სახით შენარჩუნება ნიშნავს იმას, რომ ხელისუფლება მაჟორიტარული მანდატების სრულად ათვისებას გეგმავს.

"ახალი პოლიტიკური ცენტრი" ყველა პოლიტიკურ პარტიას სამმანდატიან საარჩვნო ოლექბთან დაკაშირებით მსჯელობის დაწყებას სთავაზობს.

"გუშინ, 3 სექტემბერს, ქართული ოცნების დეპუტატებმა საქართველოს პარლამენტში დაარეგისტრირეს საკონსტიტუციო ცვლილებების პროექტი საარჩევნო სისტემის შესახებ. აღნიშნული ინიციატივით საზოგადოებისთვის ცხადი გახდა, რომ ქართული ოცნება მზად არის გადავიდეს პროპორციულ საარჩევნო მოდელზე მხოლოდ 2020 წლის საპარლამენტო არჩევნებისთვის.

ეს ნიშნავს რომ ხელისუფლება არ აპირებს რეალური ცვლილებების გატარებას არსებულ საარჩევნო სისტემაში და 2016 წლის საპარლამენტო არჩევნები ჩატარდება ისევ ძველი ერთმანდატიანი მაჟორიტარული ოლქების მოდელით, რომელსაც ქართულ ოცნებაში შემავალი ყველაპარტია წლების განმავლობაში მოიხსენიებდა ‘ხელისუფლებაზე მორგებულ’ მოდელად. ეს ასევე ნიშნავს რომ ქართულ ოცნებას უნდა ჰქონდეს გარანტირებული გამარჯვება უკლებლივ ყველა ერთმანდატიან მაჟორიტარულ ოლქში და წინასწარ გამოიწეროს73 საპარლამენტო მანდატი.

მეორე მხრივ, ნაციონალური მოძრაობა და არასაპარლამენტო ოპოზიცია სთავაზობს ხელისუფლებას ახლავე გადავიდეთ სრულად პროპორციულ საარჩევნო სისტემაზე, რასაც სჭირდება საკონსტიტუციო ცვლილებები და ყველასთვის ცხადია, რომ ასეთ ცვლილებებს საპარლამენტო უმრავლესობა მხარს არ დაუჭერს.

აღსანიშნავია, რომ საქართველოს საკონსტიტუციო სასამართლომ, მაისში მიღებული გადაწყვეტილებით, გააუქმა ერთმანდატიანი მაჟორიტარული საარჩევნო ოლქები დახელისუფლებას დაავალა ამ საარჩევნო მოდელის გადასინჯვა.

რეალურად სახეზეა ჩიხური სიტუაცია.

ახალი პოლიტიკური ცენტრი სთავაზობს ყველა საპარლამენტო და არასაპარლამენტო პოლიტიკურ პარტიას, ისევე როგორც საარჩევნო საკითხებზე მომუშავე არასამთავრობო ორგანიზაციებს, გავხსნათ დისკუსია მაჟორიტარული მანდატების განაწილების წესთან დაკავშირებით. ჩვენ გვაქვს შემუშავებული სამმანდატიან მაჟორიტარულ ოლქებად დაყოფაზე დაფუძნებული საარჩევნო სისტემის მოდელი, რომელიც ერთი მხრივ დღევანდელ მოდელთან შედარებით უზრუნველჰყოფს საარჩევნო ხმის თანასწორობის პრინციპს, როგორც ამას ურჩევენ საქართველოს ავტორიტეტული საერთაშორისო ინსტიტუტები, ხოლო მეორე მხრივ არ მისცემს გამარჯვებულ პარტიას შესაძლებლობას დაისაკუთროს მაჟორიტარული მანდატების 2/3-ზე მეტი, რაც შესაბამისად, და სამართლიანად, გაზრდის ოპოზიციური პარტიების მაჟორიტარულ წარმომადგენლობას საქართველოს პარლამენტში,"- განაცხადა ზურაბ ჯაფარიძემ.