"თუ უსუფაშვილს აინტერესებს, ავუხსნი რატომ ვფიქრობ, რომ პოლიტიკური დავალება შესრულდა"

სოც.მედია - 18:25, 03 Sep, 2015

3425

ჟურნალისტი ინგა გრიგოლია ტელეკომპანია „იმედზე“ გადაცემების დახურვასთან დაკავშირებით პარლამენტის თავმჯდომარის განცხადებას სოციალური ქსელში ეხმაურება.

„ყურადღებით მოვუსმინე, გამიკვირდა, რომ პოლიტიკურ გადაწყვეტილებას ვერ ხედავს. მეტს აღარაფერს დავწერ. არ მიმაჩნია ნორმალურად, ყოველ დილა-საღამოს ვწერო და ვამტკიცო, იყო თუ არა ჩემი დახურვა პოლიტიკური. არ მიმაჩნია ნორმალურად, დავდგე და ვიძახო, როგორ გაბედეს ჩემი დახურვათქო. არხი კერძოა და თავის გადაწყვეტილებებში თავისუფალია. მე ჩემს საქმეს გავაგრძელებ, სხვათა შორის, ძალიან დიდი ინტერესია საელჩოების მხრიდან, არასამთავრობოებისგან. ყველა შეხვედრაზე მივალ და ყველას შევხვდები ამ თემაზე, ვისაც აინტერესებს, რა როგორ მოხდა. ასევე, თუ ბ-ნ პარლამენტის თავმჯდომარეს დააინტერესებს, ავუხსნი, რატომ ვფიქრობ რომ პოლიტიკური დავალება შესრულდა... ყოველთვის, როცა მსგავსი ამბავი ხდებოდა ჩემს ცხოვრებაში, ერთ კვირაზე მეტად, არ გაგრძელებულა ჩემი დარდი.... ეგრევე ახალ პროექტებზე და გზებზე ვიწყებდი ფიქრს.... ახლაც იგივეს ვაპირებ. რაც მოხდა, უკვე წარსულია... მე კი დღეიდან სამომავლო გეგმებზე გადავედი“, - წერს გრიგოლია.

პარლამენტის თავმჯდომარის თქმით წინასაარჩევნოდ მსგავსი გადაცემები კი არ უნდა მცირდებოდეს, პირიქით მათი რიცხვი უნდა მატულობდეს.

„მე მინდა ვისურვო, რომ ყველა ტელეკომპანიამ დამოუკიდებლად გადაწყვიტოს თავისი პოლიტიკა, არ ჰკითხოს არავის, როცა რაიმე თოქ-შოუს ხსნის და არ ჰკითხოს არავის, როდესაც რაიმე თოქ-შოუს ხურავს. არ მიიღოს არანაირი რჩევები და რეკომენდაციები, რომელი ჟურნალისტი აიყვანოს სამსახურში, ან რომელ ჟურნალისტთან გაწყვიტოს კონტრაქტი“, - განაცხადა უსუფაშვილმა.