ოჯახი საბერძნეთში დაკარგულ როლანდ ჯინჭარაძეს ეძებს

პოლიტიკა - 12:21, 03 Sep, 2015

888

ჯინჭარაძეების ოჯახი საბერძნეთში დაკავებულ 25 წლის შვილს ეძებს. როლანდ ჯინჭარაძე სამი წლის წინ საბერძნეთში საზღვრის უკანონო გადაკვეთისთვის დააკავეს. მას საპატიმრო 2 კვირაში უნდა დაეტოვებინა, მაგრამ მოულოდნელად გაუჩინარდა.

როგორც დაკარგულის დედამ მზეო ჯინჭარაძემ „ნიუპოსტს“ განუცხადა, მისი შვილი ჯანმრთელობის მდგომარეობის გაუარესების შემდეგ ციხის საავადმყოფოში გადაიყვანეს, სადაც იგი ოჯახის ნათესავმა ინახულა, რომელმაც ოჯახს გადმოსცა ინფორმაცია, რომ როლანდ ჯინჭარაძის ჯანმრთელობის მდგომარეობა უკიდურესად იყო დამძიმებული. ამის შემდეგ კი როლანდ ჯინჭარაძის კვალი დაიკარგა და ოჯახი მის პოვნას ვეღარ ახერხებს.

მზეო ჯინჭარაძე უყურადღებობის შესახებ საუბრობს და აცხადებს, რომ ოჯახმა დახმარებისთვის საგარეო საქმეთა სამინისტროს მიმართა, მაგრამ უწყებისგან პასუხი ვერ მიიღო.

„სამი წელია, რაც ჩემი შვილი საბერძნეთშია დაკავებული. ორჯერ გადაუტანია პატიმრობისას ფილტვების ანთება და შემდეგ უკვე უყურადღებობისგან ფილტვებში წყალი ჩაუდგა. საავადმყოფოში გვიან გადაიყვანეს და ჩემმა შვილმა საბერძნეთშ მყოფი დეიდაშვილის ნომერი ჩააწერინა, რომ მას დაკავშირებოდენ. ჩემმა დეიდაშვილმა ნახა საავადმყოფოში როლანდი და გვითხრა, რომ ძალიან ცუდად იყო, ძვალზე გადაკრული ტყავია დარჩენილი,, ფეხზე დგომა და საკვების მიღება არ შეუძლიაო. საავადმყოფოში ექიმს უთქვამს 5 თვე ფეხზე ვერ გავლის ისე ცუდად არისო.

ამის შემდეგ ჩემი შვილი გააქრეს და აღარ ვიცით სად წაიყვანეს, საბერძნეთში ჩვენ კონსულს უთქვამს, ერთი დღე მაცადეთ, გავარკვიო სად არისო, მაგრამ ვერაფერი გაიგო. დიდხანს ვიხვეწე, რომ გავეშვი საბერძნეთში მაგრამ უარით გამომისტუმრეს, საბერძნეთიდან უნდა მოგივიდეს დასტურიო მაგრამ არაფერი მომსვლია. აღარ შემიძლია ამის გაძლება, როგორ შეიძლება შვილი დავკარგო, რადგან პატიმარია არ მიყვარს?

მივედი საგარეო საქმეთა სამინისტროში და ვითხოვე მდგომარეობის გარკვევა, მითხრს დაგიკავშირდებითო მაგრამ უკვე 8 დღე გავიდა და არავინ დამკავშირებია. არავინ ყურადღება არ მომაქცია,“- განაცხადა „ნიუპოსტთან“ საუბრისას მზეო ჯინჭარაძემ.

ჟინჭარაძეების ოჯახი დღეს ახლობლებთან ერთად აქციებს საქართველოს საგარეო საქმეთა სამინისტროსთან და მთავრობის კანცელარიასთან გამართავს. ჯინჭარაძეების ოჯახი შვილის ადგილსამყოფელის დასადგენად მთავრობის დახმარებას ითხოვს.