"ორი დღეა გვესმის მაიმუნობა"- ბოკერია კვირიკაშვილისგან ევრაზიული პრიორიტეტების დასაბუთებას ითხოვს

პოლიტიკა - 21:21, 02 Sep, 2015

2051

"ნაციონალური მოძრაობის" წევრების შეფასებით ევრაზიის კონტინენტზე არსებული პრიორიტეტებზე საუბრისას, საგარეო საქმეთა მინისტრს ამ პრიორიტეტების დასაბუთება უნდა შეეძლოს. ნაციონალური მოძრაობის საგარეო მდივნის, გიგა ბოკერიას თქმით ეს ან არაკომპეტენტურობაა, ან მცდელობა რომ „ევრაზიულის“ ხსენებას ყური მიეჩვიოს:

„ორი დღეა გვესმის მაიმუნობა და ამ ფრაზის ახსნისას მაიმუნობით გამოძრომის მცდელობა. ეს არის უკეთეს შემთხვევაში არაკომპეტენტურობა, უარეს შემთხვევაში კი ოლიგარქ ივანიშვილის კაპრიზი, რომ ყური მიგვაჩვიოს ამ ფრაზას. ორივე შემთხვევაში გვაქვს პრობლემა. კეთილი ინებონ და თქვან, რა შეიცვალა რა არის სიახლე, ეკონომიკური ურთიერთობები ჩინეთთან ყოველთვის მნიშვნელოვანი იყო საქართველოსთვის ახლა აღმოაჩინეს ეს?“- განაცხადა გიგა ბოკერიამ.

აღნიშნული განცხადება საგარეო საქმეთა ახალდანიშნული მინისტრის გიორგი კვირიკაშვილის საპასუხოდ გაკეთდა, კვირიკაშვილმა სამინსიტროს პრიორიტეტებზე საუბრისას პროდასავლური მიმართულების განვითარების პარალელურად ევრაზიის კონტინენტზე მიმდინარე მოვლენების საქართველოს სასარგებლოდ ტრანსფორმაციაზეც გაამახვილა ყურადღება

"ძალიან ბევრი საინტერესო რამ ხდება მსოფლიოში პროდასავალური მიმართულების გარდა ეს არის აღმოსავლეთთან ურთიერთობები, ახალი მოვლენები ევრაზიის კონტინენტზე და ჩვენ მაქსიმალურად შევეცდებით, რომ ყველა ამ საინტერესო მოვლენის ტრანსფორმაცია მოხდეს საქართველოსთვის როგორც პოლიტიკური ასევე ეკონომიკური კუთხით“- განაცხადა გიორგი კვირიკაშვილმა.