ევროკავშირში საქართველოს ელჩი ნატალია საბანაძე ამბობს, რომ მიგრაციის კრიზისმა ევროკავშირი რთული გამოწვევების წინაშე დააყენა.

იგი არ გამორიცხავს, რომ ამან ვიზა-ლიბერალიზაციის პროცესზე უარყოფითი გავლენა მოახდინოს.

„მიგრაციის კრიზისმა რთული გამოწვევების წინაშე დააყენა ევროკავშირი. ამ ფონზე საკმაოდ რთულია ასეთი გადაწყვეტილების მიღება. ამიტომ შეიძლება, იყოს რაღაც ფაქტორები, რომლებიც ჩვენგან დამოუკიდებელია და, რომლებმაც შეიძლება, უარყოფითად იმოქმედოს, მაგრამ მე ვარ ოპტიმისტურად განწყობილი", - განაცხადა ნატალი საბანაძემ.

განსხვავებული მოსაზრება აქვს გერმანიაში საქართველოს ელჩს ლადო ჭანტურიას. მისი თქმით, აღნიშნული საკითხი საქართველოსთვის ვიზალიბერალიზაციის მინიჭებას ხელს არ შეუშლის.

„დღევანდელი ინფორმაციით, გვეუბნებიან, რომ მიგრაციის პრობლემა ხელს არ შეუშლის ვიზალიბერალიზაციას“, - ამბობს ჭანტურია.

შეგახსენებთ, ევროკავშირში მიგრანტებთან დაკავშირებული კრიზისი გრძელდება. გუშინ ღამით საბერძნეთში, რამდენიმე ათასი მიგრანტი ჩავიდა.

ბიბისის" ცნობით, 4 400 თავშესაფრის მაძიებელი ორი გემით ათენთან ახლოს, პირეოსის პორტისკენ გაემგზავრა.

ასევე, უნგრეთის დედაქალაქში, ერთ-ერთი მთავარი სარკინიგზო სადგური დიდი რაოდენობით მიგრანტთა შედინების გამო დაიხურა.

გერმანიასა და ავსტრიაში მოხვედრის მსურველები რკინიგზის სადგურში „გერმანიას!“ სკანდირებდნენ. რამდენიმე მათგანის განცხადებით, ბილეთებში ასობით ევრო გადაიხადეს და შესაბამისად, მატარებლით გადაადგილების უფლებას ელოდებიან.